Златото достигна рекорд во нестабилна сесија, потезите на Трамп лакмус за побарувачката

Златото претрпе нестабилно тргување од неколку часа – неговата вредност достигна рекорд, а потоа падна - откако претседателот Доналд Трамп воведе царини за американскиот увоз на челик и алуминиум, што ја зголеми неизвесноста на глобалните пазари. Златната прачка постави нов рекорд од над 2.942 долари за унца, но добивката потоа беше намалена. Трамп во понеделникот рече дека најновиот круг на давачки, кои стапуваат на сила во март, ќе го зајакне домашното производство и ќе донесе повеќе работни места во САД. Тој, исто така, предупреди дека тарифите „може да бидат повисоки“.

Благородниот метал се зголеми за околу 11 проценти оваа година, поставувајќи последователни рекорди, бидејќи нарушувачките потези на Трамп во трговијата и геополитиката ја зајакнуваат неговата улога како складиште на вредност во несигурни времиња. Трговците, исто така, се обидуваат да дознаат какви би биле потенцијалните импликации за американската економија и монетарната политика доколку политиките на Белата куќа повторно ја запалат инфлацијата и го потиснат растот.

Инвеститорите ќе бидат фокусирани на сведочењето на претседателот на Федералните резерви Џером Пауел пред Конгресот денес и утре за индициите за монетарната политика. Краткорочните очекувања за инфлација во САД се искачија над долгорочните и се на највисоко ниво од 2023 година. Тоа може да го поддржи побавното темпо на олеснување на монетарната полтика, сценарио коешто е неповолно за златото бидејќи за него не се зема камата. Растот на вредноста на златото беше придружено со приливи во ЕТФ-овите (фондови со кои се тргува на берза) базирани на вредноста на скапоцениот метал. Глобалните холдинзи се зголемија во шест од последните седум недели, достигнувајќи го највисокото од ноември, според извештајот на „Блумберг“.

Банките прогнозираат дека златото би можело да порасне до 3.000 долари за унца. Меѓу нив, „Ситигруп“ (Citigroup Inc.) минатата недела соопшти дека очекува златото да го достигне тоа ниво во рок од три месеци, при што геополитичките тензии и трговските војни ја зголемуваат побарувачката. Во „ЏП Морган“ (J. P. Morgan Private Bank), целта на крајот на годината е 3.150 долари за унца, според стратегот за глобалниот пазар Јуксуан Танг.

„Додека не видиме јасност на политиките на САД, и трговските и економските, тоа ќе создаде средина за зголемени нивоа на нестабилност на златото“, рече Џозеф Каватони, висок пазарен стратег за Северна Америка во Светскиот совет за злато финансиран од производителите. „Значи, иако би можеле да видиме цена на златото од 3.000 долари, очекуваме дека може да има тековни движења што нè враќаат подолу“.

Спот златото поскапе за 0,7 проценти на 2.928,36 долари за унца во 14:10 часот. во Сингапур, откако се искачи на дури 2.942,68 долари. Меѓу другите благородни метали, среброто и платината беа рамни, додека паладиумот беше повисоко. Bloomberg Dollar Spot Index беше стабилен по искачувањето во понеделникот.

Некои пазарни мерила сугерираат дека порастот на златото може да биде претеран, сигнализирајќи дека може да дојде до пауза. 14-дневниот индекс на релативна јачина на златото - мерач на темпото и интензитетот на движењата - се приближи до 80, далеку над нивото од 70 што некои аналитичари го сметаат како показател за преценето.

Добивките на благородниот метал ги зголемија акциите на производителите. Во Хонг Конг, акциите на „Зијин мајнинг“ (Zijin Mining Group Co.) се зголемија за повеќе од четири проценти  достигнувајќи го највисокото ниво од ноември, додека во Австралија, „Норден стар рисорсес“  (Northern Star Resources Ltd.) достигна рекорд, со раст од 20 проценти оваа година.

Истовремено, кинеската централна банка ги зголеми своите златни резерви трет месец по ред во јануари, сигнализирајќи тековна посветеност за диверзификација на акциите дури и со цени на историски највисоки нивоа. Најголемата азиска економија, исто така, објави пилот програма која ќе им овозможи на 10 големи осигурителни компании за прв пат да инвестираат дури еден процент од нивните средства во златни прачки. Тоа може да достигне средства во вредност од 200 милијарди јуани (27,4 милијарди долари) средства, според „Миншенг секјуритис“.

Со помош на Yihui Xie