.webp){kind=icon}
Само за една недела цената на струјата на берзите се зголеми за над 130 евра за мегават час. На 16 август цената на централната берза во Лајпциг достигна тогаш рекордни 502 евра за мегават час, денеска на сите европски берзи договорите за ден однапред надминаа 600 евра.
На унгарската берза од каде што македонските компании купуваат струја цената надмина 630 евра. А рекордни нивоа се поставени и на берзите во Велика Британија, Франција, Германија, Италија и нордиските земји.
Во Франција, каде трговците плаќаат најмногу, договорите за еден ден однапред се зголемија за 5,5 отсто на 645 евра за мегават час. Тоа е за повеќе од седум пати повеќе од пред една година кога цените беа доста повисоки од долгогодишниот просек.
Последниот раст на цените се случува паралелно со предвидувањето дека енергијата од ветар ќе биде на исклучително ниско ниво заради екстремните горештини кои го зафатија европскиот континент, а со тоа мрежите се уште позависни од скапите фосилни горива.
Цените на природниот гас во моментов се најголем двигател на растот на цените на струјата, а растот на фјучерсите порасна заради нарушените испораки од Русија по почетокот на војната во Украина. Тоа значи дека секој дополнителен стрес, како што е падот на производството на струја од ветер заради екстремните горештини, ја зголемува побарувачката и може да придонесе за дополнителен раст на цените.
Франција е во посебно неповолна ситуација. Земјата е зависна од нуклеарните ценртрали за производство на струја. Капацитетите паднаа на најниско ниво од 43 отсто вчера, оставајќи ја земјата уште позависна од увоз од соседна Германија каде фосилните горива имаат поголем удел во снабдувањето.
Од Стопанската комора во земјава и натаму чекаат владина реакција за помош на домашните компании кои се погодени со последните сметки за струја. Трошоците по овој основ, во некои случаи им се зголемени и за 400 отсто.
„Пред мене имам конкретни податоци за сметката за струја на една компанија членка на Комората. Иако во јули годинава компанијата потрошила помалку струја од јули минатата година, сметката за струја годинава ѝ е речиси шестпати поголема во однос на јули минатата година. Лани за јули платила околу еден милион денари, а годинава за јули вкупно шест милиони денари. Кој бизнис сектор ќе го издржи ова и до кога?“, праша вчера потпретседателот на Комората, Зоран Јовановски.
Тој побара итна реакција од Владата пред уште компании да престанат со работа. Досега, годинава од Централниот регистар се избришани 5.324 фирми, а лани за цела година бројот изнесувал 6 995.
