ЕУ планира побрзо да го укине увозот на рускиот течен природен гас по притисокот од САД

Европската унија планира мерки за забрзување на постепеното укинување на увозот на руски течен природен гас, само неколку дена откако претседателот на САД, Доналд Трамп, ја повика ЕУ да преземе повеќе чекори за ограничување на енергетската трговија со Москва.

Европската комисија, извршниот орган на Унијата, разгледува можност да вклучи одредба во новиот пакет санкции со која би се укинал увозот на руски течен природен гас пред крајот на 2027 година — што беше првичниот план на ЕУ — според лица запознаени со прашањето. Според информациите на „Блумберг“, новите санкции би можеле да бидат предложени уште денеска.

Дополнително, ЕУ размислува за измена на планот наречен „Ре пауер ЕУ“ (RePowerEU), со цел да се забрза елиминацијата на зависноста од руската енергија, велат истите извори, кои побарале анонимност.

„Откако го претставивме планот „Ре пауер ЕУ“ во 2022 година, постојано велиме дека укинувањето на руската енергија е подобро да се случи порано отколку подоцна“, изјави портпаролката на Комисијата, Ана-Каиса Итконен.

Bloomberg Mercury

Администрацијата на Трамп ја повика Европа да го забрза намалувањето на увозот на руско гориво и ги притисна сојузниците да воведат царини до 100 отсто за Индија и Кина поради нивните набавки на руска нафта.

Претседателот Доналд Трамп ја повикува Европа да преземе поагресивни мерки за таргетирање на приходите од руската енергија, како услов за засилување на американскиот притисок врз Москва.

Многу земји од ЕУ се воздржани во однос на воведување царини кон Индија и Кина, па затоа вниманието на Европската комисија се насочува кон ограничување на рускиот течен природен гас (ЛНГ), според извори запознаени со ситуацијата.

Се очекува глобалниот пазар на гас да премине во вишок во втората половина од наредната година, што ќе го намали ризикот од недостиг на снабдување во Европа и потенцијални ценовни шокови. Ова ќе биде клучен фактор за ЕУ при утврдување на нов датум за целосно укинување на рускиот гас.

САД повеќепати ја изразија својата подготвеност да испорачуваат повеќе ЛНГ во Европа, особено со оглед на тоа што се очекува отворање на нови производствени капацитети во наредните години. ЕУ во последните години увезува околу 50 милијарди кубни метри ЛНГ годишно од САД, со инфраструктура за ЛНГ во околу десетина земји-членки.

Обврската за купување на повеќе американски ЛНГ е централна точка во трговскиот договор меѓу ЕУ и САД, според кој ЕУ се обврза да купи енергија во вредност од 750 милијарди долари во наредните три години.

Испораките на руски гас во Европа нагло се намалија по инвазијата врз Украина во 2022 година, но преку гасоводот преку Турција и со ЛНГ, Русија сепак учествуваше со речиси 19 отсто од вкупниот увоз на гас во ЕУ во 2024 година.

Шпанија, Белгија и Франција се меѓу најголемите увозници на руски ЛНГ.

Bloomberg Mercury

 

Иако вклучувањето на обврска за течен природен гас во следниот пакет санкции на ЕУ бара едногласна поддршка, предлозите опфатени со планот „Ре пауер ЕУ“ подлежат на гласање со квалификувано мнозинство.

Предлог-регулативата предложена порано оваа година за запирање на увозот на руски ЛНГ до крајот на 2027 моментално се разгледува од страна на земјите-членки на Европскиот парламент во Советот на ЕУ, при што секоја од институциите има право да предложи амандмани.

Друга разлика е што мерките за забрзување на постепеното укинување на рускиот ЛНГ преку „Ре пауер ЕУ“ би биле трајни, додека мерките вклучени во пакетот санкции би можеле да се укинат доколку санкциите кон Русија се повлечат во иднина.

„Европа вложи огромни напори и беше многу успешна во намалувањето на нашата зависност од руската енергија и рускиот гас“, изјави Паскал Донохоу, кој ги предводи состаноците на финансиските министри од еврозоната, за ТВ Блумберг во Копенхаген во петокот. „Комисијата посочи дека сака да го изнесе предлогот за понатамошно забрзување на намалената зависност од руската енергија, и знам дека ќе се вложат напори за тоа.“

Во моментов нема коментари за веста. Биди прв да коментира...

Остави коментар