Биткоинот блиску до најниската вредност годинава

Биткоинот флертува со можноста да се врати на најниската вредност годинава, по распродажбата на криптовалутата што уште еднаш ја турна вкупната пазарна вредност на секторот под 1 трилион (илјада милијарди) долари.

Најсилната криптовалута, досега оваа недела падна за повеќе од шест отсто и се тргуваше околу 18.620 долари од 10:28 часот во Сингапур. Пазарната капитализација на крипто опадна за сличен процент во последните 24 часа, според CoinGecko.

Зголемувањето на реалните каматни стапки, што се гледа како вистинска цена на задолжувањето, врши голем притисок врз низа ризични средства, па и криптото не е исклучок во тој поглед. Слабоста на биткоинот го приближува до најниското ниво од околу 17.600 долари постигнато во јуни, поради екцесот кај крипто-заемодавците и хеџ фондовите.

„Макро наративот е многу тешко да се игнорира и ќе влијае на ризичните средства“, посочи Кевин Лу, шеф за инвестиции во IDEG Asset Management, за Bloomberg TV. „Биткоинот е под 20.000 долари. Веќе сме биле во ваква ситуација и претходно и веројатно вредноста би можела да се намали уште малку“, додава тој.

Во исто време, се одржува оптимизмот во врска со претстојната надградба на мрежата на „Етериум“ (Ethereum), за која некои аналитичари се надеваат дека ќе привлече нови инвестиции во етер и други дигитални средства.

„Биткоинот беше на 3.000 долари во првата крипто-зима и ако ги погледнете движењата од еден до друг пад, трендот е дека се движиме нагоре, гледано на долг рок“, објаснува Лу.

Индексот на најголемите дигитални токени MVIS CryptoCompare Digital Assets 100 годинава ослабна за околу 60 отсто. Биткоинот драстично падна од рекордно високото ниво од ерата на пандемијата од речиси 69.000 долари во ноември минатата година.

Во моментов нема коментари за веста. Биди прв да коментира...

Остави коментар