Златото е близу нов рекорд поради облозите за намалување на каматните стапки во САД

Вредноста на златото порасна петти ден по ред, поддржана од облозите за поблага ориентација на Федералните резерви на САД (Фед) и повлекувањето на технолошките акции што се сметаат за ризични по смелото трошење на вештачка интелигенција (ВИ).

Цената на златото се покачи дури за 1,1 отсто во најдолгата низа на победи од периодот пред октомврискиот рекорд. Азиските акции утрово паднаа, а апетитот за ризик во светот се намалува бидејќи расте сомнежот за способноста на технолошките компании да ги одржат своите високи процени и големите трошоци за ВИ. Сето тоа ја зголемува привлечноста на златото како засолниште во последната целосно трговска недела од годината.

Биковите за злато се обложуваат и на понатамошно монетарно олеснување во САД следната година, откако Фед минатата недела го објави своето трето последователно намалување на каматните стапки. Пониските трошоци за задолжување обично претставуваат ветер во грб за благородните метали, како златото и среброто, кои инаку не носат принос.

Bloomberg Mercury

 

Во интервју за „Волстрит журнал“ (Wall Street Journal) во петокот, американскиот претседател Доналд Трамп повика на агресивно намалување на каматните стапки и рече дека очекува следниот претседател на Фед да се консултира со него за монетарната политика. Тој ги именуваше Кевин Хасет и Кевин Ворш како негови главни избори за наследник на Џером Пауел.

Златото оваа година скокна за над 65 проценти, а среброто повеќе од двојно, при што двата метала се на добар пат да ги остварат своите најдобри годишни перформанси од 1979 година. Силниот раст е поткрепен со зголеменото купување од страна на централните банки и повлекувањето на инвеститорите од државните обврзници и валути. Вложувањата во фондови поддржани од злато со кои се тргува на берза се зголемуваа секој месец оваа година, освен во мај, според Светскиот совет за злато.

 

„Сè уште очекуваме дека континуираното купување од страна на централните банки, заедно со приливот на приватни инвеститори во услови на олабавување од Фед, ќе ја подигне цената на златото на 4.900 долари до крајот на 2026 година“, велат аналитичарите од „Голдман Сакс“ (Goldman Sachs Group Inc.), вклучувајќи ја и Лина Томас. Зголемената акумулација од страна на централните банки беше „повеќегодишен тренд“, рекоа тие, повторувајќи ја прогнозата за просечни месечни купувања од 70 тони во 2026 година.

Златото во 2026 година ќе се соочи со две полувремиња, поточно ќе достигне врв од близу 4.800 долари кон крајот на вториот квартал пред да се повлече, изјавија аналитичарите на АНЗ (ANZ Group Holdings Ltd.), Сони Кумари и Даниел Хајнс. Како фактори за поддршка на благородниот метал тие ги наведоа „отпорните“ инвестициски текови и купувањето од страна на централните банки.

Во меѓувреме среброто зајакна во последните недели од шпекулативните облози за долготрајната стеснетост на понудата по историскиот притисок во октомври. Белиот метал, кој во петокот достигна рекорд од 64,6573 долари за унца, ќе продолжи да наоѓа поддршка во пазарниот дефицит, како и во отпорната индустриска побарувачка и неизвесноста околу политиката на увоз на САД, се наведува во белешката на АНЗ.

Минатиот месец Американскиот геолошки завод го додаде среброто на својата листа на критични минерали, што значи дека трговците се претпазливи во врска со изнесувањето сребро од САД во случај подоцна да бидат воведени увозни царини. Аналитичарите на АНЗ изјавија дека очекуваат среброто да биде исклучено од царините, а потврдата за таквата одлука веројатно ќе предизвика одлив на металот и ќе го ублажи недостигот.

Во рамките на утринското азиско тргување златото порасна за еден отсто и се тргуваше по цена од 4.342,90 долари за унца, што е блиску до рекордот од 4.381,52 долари постигнат кон крајот на октомври. Среброто порасна за 2,1 отсто и достигна 63,29 долари, надоместувајќи ги речиси сите загуби во петокот. Вредноста на платината се зголеми дури за 3,2 проценти, на највисоко ниво од септември 2011 година, а порасна и паладиумот. Индексот за вредноста на доларот Bloomberg Dollar Spot се намали за 0,1 отсто.