Златото по 50-ти пат постави дневен рекорд оваа година

Цената на златото скокна на рекордно високо ниво, и тоа по 50-ти пат оваа година. Причината за растот е ескалацијата на геополитичките тензии и изгледите за повеќе намалувања на каматните стапки во САД. Среброто, исто така, достигна рекорд.

Спот златото се искачи за 1,2 проценти, на нешто под 4.500 долари за унца, продолжувајќи ги добивките по најголемиот еднодневен скок во повеќе од еден месец. Трговците се обложуваат дека по трите последователни намалувања на каматните стапки, американските Федерални резерви (Фед) повторно ќе ги намалат трошоците за задолжување следната година, што би било поволен момент за скапоцените метали што не даваат принос.

Привлечноста на златото како засолниште исто така се засили во последната недела поради зголемените геополитички тензии, особено во Венецуела, каде што САД ги блокираа танкерите за нафта додека го зголемуваат притисокот врз владата на претседателот Николас Мадуро.

Bloomberg Mercury

 

„Геополитичките превирања повторно се во фокусот“, рече Ахмад Асири, стратег во „Пеперстоун груп“ (Pepperstone Group), посочувајќи на запленувањата на танкерите за нафта. „Овие случувања, иако не предизвикуваат директно намалување на ризикот, несомнено ја зголемуваат побарувачката за злато како задолжителна заштита.“

Вредноста на златото оваа година скокна за 70 проценти и е на добар пат да оствари најдобри годишни перформанси од 1979 година. Брзиот раст е поткрепен и со зголемените купувања од централните банки и приливите во фондови за тргување со злато, при што вкупните вложувања во ЕТФ-ови поддржани од злато годинава се зголемуваа секој месец, освен во мај, според податоците на Светскиот совет за злато.

Агресивните потези на американскиот претседател Доналд Трамп за преобликување на глобалната трговија, како и неговите закани за независноста на Фед, дополнително го поттикнаа растот оваа година. Инвеститорите беа делумно поттикнати и од таканаречената трговија со девалвација - повлекување од државните обврзници и валутите во кои се деноминирани поради страв дека нивната вредност ќе еродира со текот на времето поради зголемените нивоа на долг.

Големото купување од ЕТФ-овите беше главен двигател на неодамнешниот пораст. Влоговите во „SPDR Gold Trust“ на „Стејт стрит“ (State Street Corp.), најголемиот ЕТФ за скапоцени метали, денеска се зголемија за 12 тони, или нешто повеќе од еден отсто. Тоа беше највисокото еднодневно зголемување од октомври.

„Приливот на ЕТФ за злато во текот на изминатите неколку месеци беше воден главно од малопродажни, а не од институционални инвеститори“, рече Апорва Џавадекар, главен економист во „Матут финкорп“ (Muthoot Fincorp Ltd). Нестабилноста на цените ќе остане висока бидејќи „тековите на малопродажба се помалку лепливи“, рече тој.

Bloomberg Mercury

 

Златото брзо закрепна по повлекувањето од претходниот врв од 4.381 долар во октомври, кога растот се сметаше за прегреан, и сега е во позиција да ги пренесе овие добивки во следната година. „Голдман Сакс“ (Goldman Sachs Group Inc.) е меѓу неколкуте банки што предвидуваат дека цените ќе продолжат да растат во 2026 година, нудејќи основно сценарио од 4.900 долари за унца со ризици за раст.

Среброто порасна дури за 1,4 проценти, на речиси 70 долари за унца. Растот на белиот метал од околу 140 отсто оваа година беше уште поспектакуларен од тој на златото, а неговиот најнов ценовен скок е поттикнат од шпекулативните приливи и долготрајните дислокации на понудата низ главните трговски центри по историскиот кусок и притисоците од тоа во октомври.

Трезорите во Лондон оттогаш забележаа значителни приливи, но голем дел од достапното сребро во светот останува во Њујорк, додека трговците го чекаат исходот од истрагата на Министерството за трговија на САД за тоа дали увозот на критични минерали ја загрозува националната безбедност, што би можело да доведе до тарифи или трговски ограничувања за металот. Во меѓувреме во Кина среброто што се чува во магацини поврзани со Шангајската фјучерсна берза минатиот месец достигна најниско ниво од 2015 година.

Индексот на релативната јачина на златото покажува дека металот се преселил во територија на прекупеност, со отчитување денеска од 80,3. Среброто, кое моментално е на 79,1, ги држи овие покачени нивоа околу две недели. Отчитувањата над 70 обично сигнализираат услови на прекупување.

Но тоа не ги одврати инвеститорите. „Наместо продавачите да интервенираат агресивно, и златото и среброто продолжуваат да привлекуваат силни купувања“, рече Асири од „Пеперстоун“. „Ова однесување сугерира дека 4.500 и 70 долари помалку се третираат како цврсти горни граници, а повеќе како референтни точки во рамките на тековните трендови, оставајќи ги двата метала цврсто поддржани засега и за време на празниците.“

Спот златото во рамките на азиското тргување денеска порасна за 0,7 отсто, на 4.473 долари за унца, откако претходно достигна рекорд од 4.497,74 долари. Среброто поскапе за 0,2 отсто, искачувајќи се на 69,20 долари. Платината порасна за 1,3 отсто, а паладиумот за еден отсто, додека индексот Bloomberg Dollar Spot падна за 0,2 проценти.