Цената на среброто скокна над 80 долари во историскиот раст на крајот од годината

Среброто надмина 80 долари за унца, што е рекордно високо ценовно ниво, продолжувајќи го со тоа големиот раст на крајот од годината поттикнат од шпекулативни тргувања и постојано несовпаѓање меѓу понудата и побарувачката.

Белиот метал како да се вози на ролеркостер: скокна дури за шест отсто, што го однесе на 84 долари за унца во тргувањето рано утрово, а потоа падна под претходното затворање, пред одново да закрепне. Послабиот долар и растечките геополитички тензии ја зголемија привлечноста на скапоцените метали генерално, па златото и платината стигнаа до рекордни ценовни нивоа.

 

 

Раниот раст денеска дојде по коментарот на Илон Маск за време на викендот, кој го истакна растечкото лудило на инвеститорите околу скапоцените метали. Маск одговори на твит за кинеските ограничувања на извозот истакнувајќи на мрежата X: „Ова не е добро. Среброто е потребно во многу индустриски процеси“.

Bloomberg Mercury

 

Кинеските мерки се всушност продолжување на претходните политики, а Министерството за трговија првпат ги објави на 30 октомври. Иако Кина е рангирана меѓу трите најголеми глобални производители на сребро, таа истовремено е и најголем потрошувач во светот, а со тоа и не е голем извозник.

„Шпекулативната атмосфера е многу силна“, рече Ванг Јанкинг, аналитичар во „Чајна фјучерс“ (China Futures Ltd.), додавајќи дека секоја дискусија за потезите на Пекинг за намалување на извозот е неоснована. „Постои возбуда околу тесната спот понуда, а сега е малку екстремна.“

Забрзувањето на растот на среброто, кое доби повеќе од 40 проценти овој месец и се движи кон својот најдобар годишен резултат во број на остварени рекорди од 1951 година, го заокружува едногодишниот раст на скапоцените метали. Добивките се поттикнати од зголемените купувања од централните банки, приливите во фондовите што се тргуваат на берза и трите последователни намалувања на стапките од страна на Федералните резерви на САД. Пониските трошоци за позајмување се опасен ветер за стоките за кои не се плаќа камата, а трговците се обложуваат на повеќе намалувања на стапките во 2026 година.

„Немојте да се залажувате: сведоци сме на генерациски меур што се развива за среброто“, рече Тони Сикамор, пазарен аналитичар во „ИГ Австралија“ (IG Australia). „Со оглед на тоа дека развојот на нови рудници трае и до 10 години, невозможно е да се каже кога би можел да излезе воздухот.“

За разлика од златото, среброто има и многу корисни својства од реалниот свет што го прават вредна компонента во низа производи како што се соларни панели, центри за податоци со вештачка интелигенција и електроника. Со резерви блиску до најниските рекордни нивоа, постои ризик од недостиг од понуда што би можел да влијае на повеќе индустрии.

Во последниот пресек на азиското тргување, вредноста на среброто се зголеми за 1,2 отсто, на 80,24 долари за унца, откако претходно достигна рекорд од 84,01 долари во текот на сесијата, а потоа нагло падна. Цената на златото падна за 0,4 проценти, на 4.515,20 долари, што претставува тргување под рекордот од 4.549,92 долари што беше достигнат во петокот. Платината и паладиумот се повлекоа - вториот метал дури за повеќе од шест отсто - откако достигнаа рекордни максимуми во претходната сесија.