Танкери натоварени со руска нафта испловија кон индиската рафинерија на „Рилајанс“

Најмалку три танкери натоварени со руска сурова нафта пловат кон рафинеријата на „Рилајанс“ (Reliance Industries Ltd.) на западниот брег на Индија, откако компанијата повторно започна со умерени набавки по кратката пауза предизвикана од зголемениот притисок од САД.

Бродовите, кои превезуваат речиси 2,2 милиони барели сурова нафта „Уралс“, се на пат кон големиот комплекс во Џамнагар и треба да ги испорачаат товарите на почетокот на месецов, покажуваат податоците на аналитичката компанија „Кплер“ (Kpler). Нафтата ќе биде преработена во горива за домашниот пазар, а не за извоз.

„Рилајанс“ претходно ги стопираше набавките откако САД во октомври ги ставија на црната листа „Роснефт“ (Rosneft PJSC) и „Лукоил“ (Lukoil PJSC), но компанијата повторно почна да купува од други добавувачи, објави минатата недела „Блумберг њус“ (Bloomberg News).

„Роснефт“ претходно беше најголем снабдувач на руска нафта за индиската рафинерија, врз основа на долгорочен договор за испорака од 500.000 барели дневно.

Портпаролот на „Рилајанс“ не одговори веднаш на барањето за коментар пратено по е-пошта.

Bloomberg

Индија во последниот период се најде под зголемена критика од американскиот претседател Доналд Трамп и дел од неговата администрација поради трговијата со руска нафта, забелешки на кои властите во Њу Делхи јавно се спротивставија. Неизвесноста доведе индиските рафинерии да ги намалат набавките, при што увозот минатиот месец се спушти на најниско ниво во последните три години.

„Рилајанс“, која е под контрола на милијардерот Мукеш Амбани, беше најголемиот светски купувач на руска сурова нафта во поголемиот дел од периодот 2024–2025 година, според податоците на „Кплер“ (Kpler). Индија и Кина станаа клучни пазари за нафтата од земјите членки на ОПЕК+, откако западните купувачи го намалија увозот поради војната во Украина.

Новите пратки што ги набави „Рилајанс“ ги обезбедуваат трговците „Алгаф Марин“ (Alghaf Marine DMCC), „Редвуд Глобал“ (Redwood Global Supply FZ LLC), „Рус Експорт“ (RusExport) и „Етос Енерџи“ (Ethos Energy), покажуваат податоците на „Кплер“. „Алгаф Марин“ и „Редвуд Глобал“ се под санкции од Обединетото Кралство, а првата компанија е наследник на блискоисточната филијала на „Литаско“, трговското крило на „Лукоил“.

Испораките на руска нафта до рафинерискиот комплекс на „Рилајанс“ во Џамнагар паднаа на околу 270.000 барели дневно во декември или нешто под 20 отсто од вкупниот увоз на компанијата од светските пазари, наведува „Кплер“. Тоа е значително помалку во однос на периодот од јануари до ноември, кога руските деривати учествуваа со повеќе од 40 отсто.

„Рилајанс“ не е единствената индиска рафинерија што купува руска сурова нафта. Државните компании „Индијан Ојл“ (Indian Oil Corp.) и „Барат петролеум“ (Bharat Petroleum Corp.) исто така набавуваат пратки од добавувачи кои не се под санкции. Тоа се должи на високите попусти, ниските преработувачки маржи и неизвесноста околу трговските разговори со Вашингтон.