Три индиски танкери повторно испловија од Ормуз, расте поморскиот сообраќај низ теснецот

Три целосно натоварени индиски супертанкери се појавија во Оманскиот Залив, што дополнително укажува на зголемен сообраќај во двата правци по северната и јужната рута низ Ормускиот Теснец, и покрај спротивставените тврдења за состојбата со пловидбата.

Бродовите „Деш Вибхор“ (Desh Vibhor), „Деш Ваибхав“ (Desh Vaibhav) и „Санмар Хералд“ (Sanmar Herald) беа забележани во Оманскиот Залив и Арапското Море во неделата, откако последен пат емитувале сигнал додека се обидувале да го преминат Ормускиот Теснец доцна во петокот, покажуваат податоците за следење на бродови што ги обработи „Блумберг њуз“.

Супертанкерите, кои сигнализираат индиска сопственост или превезуваат товар наменет за Индија, заедно носат речиси шест милиони барели ирачка и кувајтска нафта. Не можеше веднаш да се утврди по која рута пловеле, но нивниот обид да се движат кон островот Кешм сугерира дека можеби користеле траса одобрена од Техеран.

„Шипинг корпорејшн“ (Shipping Corporation of India), која во базата на податоци „Еквазис“ (Equasis) е наведена како сопственик и управител на „Деш Вибхор“ и „Деш Ваибхав“, не одговори веднаш на барањата за коментар испратени по електронска пошта надвор од редовното работно време. Ниту „Санмар шипинг“ (Sanmar Shipping Ltd.), операторот на „Санмар Хералд“, не одговори веднаш.

Bloomberg

Патувањата на овие многу големи танкери за превоз на сурова нафта се дел од сè подолгата листа бродови што повторно започнаа да го преминуваат енергетскиот теснец во двата правци. Пловидбата продолжува во услови на спротивставени тврдења меѓу Иран и САД, во момент кога двете страни треба да започнат преговори за мировен договор.

Иран во саботата прогласи дека Ормуз е затворен, тврдејќи дека тоа го прави поради продолжените израелски напади во јужен Либан, кои според Техеран претставуваат прекршување на договорот за примирје. Американската Централна команда во саботата го оспори тоа тврдење, наведувајќи дека сообраќајот се зголемил и дека низ теснецот поминале 55 трговски бродови кои испорачале речиси 17 милиони барели нафта на светските пазари.

Некои танкери и доцна во саботата продолжиле да се приближуваат кон Ормуз. Три целосно натоварени супертанкери со сурова нафта биле забележани како влегуваат во теснецот од оманската страна, по што престанале да емитуваат сигнал. Еден превезува два милиони барели саудиска нафта за Јапонија, додека друг товари два милиони барели катарска нафта за засега непозната дестинација. Двата танкери ја следеле истата рута како и трет брод што неколку часа претходно превезувал товар од Обединетите Арапски Емирати.

Се појавуваат транзитни рути низ Ормуз

Пакистан пријави мина во близина на јужната транзитна рута

Извор: Joint Maritime Information Center, Persian Gulf Strait Authority, National Hydrographic Office Pakistan

Во спротивна насока, исто така долж брегот на Оман, три празни танкери отворено ја емитувале својата позиција додека пловеле кон Персискиот Залив, покажуваат податоците. Еден од нив бил многу голем брод за превоз на течен природен гас, кој пристигнал од Дукам во Оманскиот Залив, а потоа ги исклучил транспондерите откако последен пат бил регистриран во Персискиот Залив доцна во саботата.

Останатите два брода биле супертанкери за сурова нафта кои неодамна испорачале нафта од Обединетите Арапски Емирати. Еден од нив пред неколку дена јавно ја емитувал својата позиција на сидриште во Оманскиот Залив. Познато е дека некои производители од Заливот испраќаат танкери низ Ормуз без вклучени сигнали, за товарот потоа да биде префрлен на други бродови што чекаат во тие води без да се привлекува внимание кон пратките.

Беа забележани и бродови за превоз на течен природен гас како влегуваат во Персискиот Залив, а податоците за следење покажуваат дека тоа го сториле доцна во петокот.

Движењата на танкерите долж брегот на Оман доаѓаат откако клучна група за размена на поморски информации во саботата соопшти дека бродовите можат да ја користат јужната рута со вклучени сигнали.

„На морепловците им се препорачува да ја користат јужната рута дење или ноќе со вклучен АИС-систем, активни радари, вклучени навигациски светла и нормална употреба на ВХФ-комуникација“, соопшти Заедничкиот воен информативен центар, мислејќи на автоматскиот систем за идентификација преку транспондери и радиокомуникација со многу висока фреквенција.

Тоа е спротивно на препораката што американските власти ја издадоа неколку дена претходно, според која бродовите треба да размислат за пловидба по таа рута без емитување сигнали од транспондерите. Препораката на Заедничкиот воен информативен центар следуваше и по предупредувањето на Пакистан во петокот доцна навечер дека е потврдена мина долж јужната рута. Пакистан е одговорен за координација на навигациските предупредувања во тој регион.