Ирак го зголемува производството на нафта по договорот меѓу САД и Иран

Ирак им наложи на операторите на пет големи нафтени полиња да го зголемат производството на нивото од пред војната, со цел да достигне повеќе од три милиони барели дневно, по договорот меѓу САД и Иран кој има за цел целосно повторно отворање на Ормускиот Теснец.

„Басра оил“ (Basra Oil Co.) побара зголемување на производството до максималниот достапен капацитет на полињата Румаила, Западна Курна-1, Западна Курна-2, Зубаир и Артави, според документ од 19 јуни во кој увид имал Блумберг.

Враќањето на повисоко ниво на производство ќе се одвива постепено и ќе зависи од оперативните услови и од способноста на купувачите да обезбедат танкери за товарење, изјави за Блумберг портпаролот на Министерството за нафта, Салим Ал-Рикаби.

Директорот на ирачката државна компанија за тргување со нафта „СОМО“ (SOMO), Али Низар, во интервју за телевизијата „Ирак 24“ изјави дека во моментов два брода се товараат на јужниот терминал на земјата, но дека ќе биде потребно повеќе танкери да влезат во Ормускиот Теснец за производството да продолжи да расте.

Вториот најголем производител во ОПЕК забележа драматичен пад на извозот на нафта откако војната меѓу САД и Иран речиси целосно го запре поморскиот сообраќај низ теснецот. Ирак зависи од овој воден пат за најголемиот дел од извозот на сурова нафта и има ограничен капацитет за транспорт преку копнени нафтоводи, кои некои од неговите соседи ги користеа во екот на кризата.

Сепак, производството во јужниот дел на земјата, кој претставува срце на ирачката нафтена индустрија и каде што се наоѓаат овие пет полиња, веќе се искачи на 1,5 милиони барели дневно во последните денови, изјави оваа недела висок извршен директор од секторот.

Компаниите од кои беше побарано да почнат да го зголемуваат производството на овие полиња веќе започнале активности за негово проширување, изјави Ал-Рикаби.

Во моментов фокусот е ставен на полињата што произведуваат придружен природен гас, кој би помогнал во задоволувањето на домашната побарувачка за производство на електрична енергија и гориво за домаќинствата.