Бројот на бродови што можат да складираат нафта од големите производители на Блискиот Исток брзо се намалува, при што во Персискиот Залив се видливи само девет празни супертанкери за сурова нафта. Откако тие ќе се наполнат, копнените резервоари за складирање брзо ќе се исполнат, што може да доведе до дополнително намалување на производството.
Секој танкер може да прими околу 2 милиони барели сурова нафта, што е еквивалентно на само пет часа од вкупното дневно производство на Саудиска Арабија.
Бродовите не можат да влезат во Заливот откако Иран се закани дека ќе напаѓа пловила што го користат клучниот Ормускиот теснец. Техеран веќе ги спроведе тие закани, напаѓајќи со дронови и ракети неколку бродови во овој поморски коридор.
Саудиска Арабија и Обединетите Арапски Емирати, единствените два регионални производители кои можат да пренасочат дел од нафтата преку нафтоводи и да го заобиколат теснецот, го зголемуваат извозот од терминали надвор од регионот, но ниту една од двете земји нема капацитет целосно да го избегне овој поморски пат.
Податоците за следење на бродови што ги анализира „Блумберг“ покажуваат дека во регионот има вкупно 74 супертанкери за сурова нафта, но две третини од нив се веќе целосно или делумно натоварени. Уште пет се закотвени на терминали за товарење и преземаат нафта, додека неколку се користат како пловечки складишта во близина на Ирак или се поврзани со Иран.
Картата погоре ги прикажува најновите сигнали за позицијата на деветте празни танкери. Осум од нив се со временска ознака од 6 март, додека еден сигнал потекнува од неделата. Дел од позициите може да бидат неточни поради широко распространетото лажно емитување на сигнали во регионот.
Супертанкери во Персискиот Залив
Во регионот се видливи само девет празни супертанкери за сурова нафта
Bloomberg
Бродовите беа идентификувани со пребарување на сите супертанкери ВЛЦЦ (VLCC - Very Large Crude Carrier, огромен нафтен супертанкер што може да превезува околу 2 милиони барели сурова нафта), што испратиле сигнал за позиција од Персискиот Залив од 26 февруари, односно пред САД и Израел да го започнат нападот врз Иран, а потоа биле исклучени сите што го напуштиле регионот. Потоа бродовите биле следени за да се потврди дали и каде биле натоварени.
Пловилата поврзани со Иран се идентификувани врз основа на нивната сопственост, осигурителите и претходните движења.
.webp){kind=icon}
