text size
Дизел-горивото поскапува за 14,5 денари, а бензините за пет денари од ноќеска на полноќ, објави денеска Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ). Со најновата одлука се врши зголемување на малопродажните цени на нафтените деривати во просек за 14,27 отсто во однос на одлуката од 2 март годинава.
Во соопштението се наведува дека референтните цени на нафтените деривати на светскиот пазар во споредба со претходната пресметка бележат значајно зголемување. Кај бензините зголемувањето е во просек за 13,38 проценти, кај дизелот за 36,13 отсто, кај екстра-лесното масло за 32,1 проценти и кај мазутот зголемувањето е за 27,87 отсто.
Од утре една минута по полноќ, бензинот еуросупер БС-95 ќе чини 79,5 денари за литар, додека моторниот бензин еуросупер БС-98 ќе се продава за 81,5 денар за литар.
Според новиот ценовник, еден литар дизел гориво еуродизел БС (Д-Е V) ќе чини 85,5 денари. Маслото за горење екстра-лесно 1 (ЕЛ-1) ќе чини 82,5 денари за литар, додека мазутот ќе чини 42,586 денари за килограм, или кај екстра-лесното масло за домаќинство (ЕЛ-1) цената се зголемува за 12,5 денари за литар, а кај мазутот за 7,04 денари за килограм.
Цената на нафтата надмина 100 долари за барел, бидејќи повеќе големи производители од Блискиот Исток го намалија производството, иако разговорите за координирано ослободување на резервите го намалија притисокот на пазарот погоден од војната на Блискиот Исток.
Минатата недела Регулаторната комисија за енергетика ја укина одлуката според која секогаш кога цените на горивото треба да се зголемат или намалат за два денари ќе прави нови пресметки и ќе утврдува нови цени.
Ова практично значеше дека Комисијата ќе заседава само во понеделник, како во редовни услови. Пред да биде донесена оваа одлука, на седница на комисијата, а во време кога нафтата веќе поскапуваше беше одлучено бензините да поскапат за денар, а цената на дизелот остана непроменета.
На пазарот веќе се чувствува криза и се создава метеж.
.webp){kind=icon}
