Дизелот поскапува на 99,5 денари, највисока цена од почетокот на војната со Иран

Од полноќ за два денара поевтинуваат бензините, а дизелот поскапува за еден денар. Нова, повисока цена за половина денар ќе има и екстра-лесното масло за домаќинство, одлучи денеска Регулаторната комисија за енергетика (РКЕ).

Според ова, максималната малопродажна цена на еуросупер БС-95 ќе биде 91 денар за литар, а еуросупер БС-98 ќе се продава по цена од 93 денари за литар. Цената на дизелот од полноќ ќе биде 99,5 денари за литар, а на екстра-лесното масло за домаќинство 98,5 денари за литар.

Новата малопродажна цена на дизелот е највисока од почетокот на војната меѓу САД и Иран на крајот од февруари годинава. Највисоката цена досега беше онаа што беше одредена од РКЕ на 7 април, од 98 денари. Од прекршувањето на примирјето, пак, и повторниот почеток на конфликтот на Блискиот Исток од крајот на јуни, цената на литар дизел на бензинските пумпи е покачена за речиси 25 отсто, поточно 24,38 отсто. 

 

 

Малопродажната цена на мазутот, инаку,  се намалува за 1,680 ден./кг и ќе изнесува 46,419 денари.

Од РКЕ посочуваат дека во денешната одлука е применет намален износ на акцизата од 2 ден./л кај бензините и намалениот износ на акцизата од 4 ден./л кај дизелот.

Како што веќе пишуваше „Блумберг Адрија“, низ Европа се зголемува напнатоста околу дизелот, бидејќи истовремено се совпаѓаат повеќе предизвици во снабдувањето, што предизвика рекордни маржи кај европските рафинерии и намалување на резервите.

Глобалните енергетски пазари беа потресени овој месец од новото разгорување на војната меѓу САД и Иран, иако цените на нафтените деривати се зголемија посилно од основната сурова нафта. Пазарот за дизел гориво е под притисок поради низа фактори, вклучувајќи ги прекините во Ормускиот Теснец, но и украинските напади врз руските рафинерии и забраната за извоз на дизел што ја воведе Москва.

„Вистинското тесно грло во нафтениот систем во моментов е рафинирањето, повеќе одошто самата сурова нафта. Епицентарот на кризата е пазарот на дизел, особено во Европа“, се наведува во анализата на „Морган Стенли“ што ја цитираше „Блумберг“.