Топлотниот бран ја пресушува Рајна, расте ризикот за снабдувањето со гориво

Водостојот на клучната точка на реката Рајна достигна најниско ниво какво што за овој период од годината не е забележано со децении, додека Европа се соочува со силни топлотни бранови, што го ограничува транспортот на гориво кон јужна Германија и Швајцарија.

Водостојот на внимателно следената точка кај Кауб, западно од Франкфурт, овој месец се спушти под нивото од 2022 година, кога сушата го наруши комерцијалниот речен сообраќај низ Европа. Според најстарите достапни податоци на германските федерални власти, обработени од „Блумберг“, длабочината за пловидба на товарните бродови кај Кауб е најниска за овој период од годината најмалку од 1990 година.

Внатрешните дестинации зависат од Рајна за транспорт на горива и други суровини до и од подрачјето на Ротердам. Реката, долга околу 1.290 километри, се протега од Швајцарија до Северното Море и служи за транспорт на јаглен, нафтени деривати, железна руда и стока во контејнери.

Количината товар што може да се пренесе до дестинациите на Горна Рајна, по преминувањето на тесното грло кај Кауб, е „исклучително ограничена и не се очекува значително подобрување“, наведува брокерската компанија „Риверлејк“ (Riverlake) во белешка. Според компанијата, товарните бродови можат да пренесат околу 460 тони товар по течението нагоре од Кауб, што е помалку од една петтина од вообичаениот капацитет.

Водостојот на Рајна паѓа на клучното тесно грло

Падот сериозно го нарушува транспортот од подрачјето на Ротердам кон внатрешноста

Bloomberg

Европа, континентот што се затоплува најбрзо во светот, веќе се соочува со третиот топлотен бран оваа сезона. Екстремните температури вршат притисок врз електроенергетската и водната инфраструктура, ги пресушуваат реките и почвата, го оптоваруваат здравствениот систем и предизвикуваат шумски пожари. Климатските промени придонесуваат топлотните бранови во регионот да траат подолго, да се јавуваат почесто и да бидат поинтензивни.

Трошокот за транспорт на дизел од Ротердам, исто така, е висок за овој период од годината. Цената за превоз на дизел со товарните бродови, до Карлсруе во јужна Германија од подрачјето на Ротердам минатата недела порасна за 56 отсто, на 70 евра за тон.

Преку Рајна се транспортира и јаглен за снабдување на електраните, а во минатото нискиот водостој ги принудуваше дел од производителите да го ограничат користењето на залихите. Тоа често се случува во периоди на високи температури, кога побарувачката за електрична енергија расте поради користењето климатизација, а електраните на јаглен се потребни за задоволување на зголемената потрошувачка.