Раст на осигурителниот пазар во третиот квартал

Осигурителниот пазар во Македонија пораснал за 12,6 проценти во третиот квартал годинава, покажуваат податоците од Националното биро за осигурување. Бруто полисираната премија (БПП) на крајот од септември имала вредност од 12,2 милијарди денари (198,4 милиони евра) во однос на 10,8 милијарди денари (176 милиони евра) пред една година.

Животното осигурување има поголем раст од неживотното, односно БПП овде е за 20,8 проценти повисока од лани и изнесува 33,5 милиони евра во третиот квартал, додека неживотното осигурување има раст од 11,06 проценти, на 164,7 милиони евра вредна БПП.

Што се однесува до бруто исплатените штети (БИШ), тука растот на ниво на цел сектор е 4,7 проценти, при што кај неживотното осигурување БИШ имаат вредност од 58,9 милиони евра (раст од 2,55 проценти), додека кај животното осигурување БИШ изнесуваат 11,4 милиони евра (раст од 17,2 проценти за една година).

Кај поединечните класи на неживотно осигурување, најголем пораст на БПП има кај другите класи неживот, од 25 проценти, кои сочинуваат 16,7 проценти од вкупното неживотно осигурување. Кај најзастапената класа, автоодговорноста, на која отпаѓаат 44 проценти од вкупното неживотно, порастот е 5,44 проценти, додека полисите за осигурувања имот достигнале вредност повисока за 12 проценти во однос на лани.

Каско-осигурувањето на моторни возила пораснало за речиси 16 проценти, осигурувањето од незгода за 12,2 проценти, туристичка помош за 2,9 проценти итн.

Кај бруто исплатените штети, најголем пораст има кај туристичката помош, речиси 54 проценти, пред другите класи неживот, каде што има пораст на БИШ за 30,9 проценти. Кај автоодговорноста има пораст на БИШ од само 1,2 проценти, а кај каско-осигурувањето возила, за 7 проценти. Пад од речиси 35 проценти има на БИШ кај осигурувањето имот.

Гледано по учесници на пазарот, најголем пазарен удел има „Македонија осигурување“, од 18,03 проценти, за разлика од лани, кога држела 19,45 проценти од пазарот. Следуваат „Триглав осигурување“ со 12,57 проценти (12,63), „Еуролинк“ со 11,72 проценти (11,73), „Уника“ со 11,3 проценти (10,69) итн.

Кај животното осигурување, пазарен лидер е „Кроација живот“ со 27,7 проценти од вкупната БПП, додека лани истиот период имала 29,8 проценти од пазарот. Следуваат „Триглав живот“ со 22,57 проценти (18 проценти лани), „Винер живот“ со 20,36 проценти (20, 27), „Граве“ со 18,54 проценти (20,24) итн.