Берзански неделен преглед - берзите во празнично расположение

Неделата зад нас на пазарите на капитал во Адрија регионот помина во мешано, празнично расположение, со позитивни поместувања на поголемите берзи, но и благ песимизам на помалите. Додека корпоративните вести од Загреб и Љубљана носат оптимизам, инвеститорите на глобално ниво со нетрпение го очекуваат таканареченото „Santa Claus Rally“, кое засега изостана.

Анализата на неделата на берзите во Љубљана, Загреб, Белград, Бања Лука, Сараево и Скопје, како и освртот за наредните денови, ги направи Силвана Милиќ, аналитичарка за корпоративни финансии на „Блумберг Адрија“.

Загреб слави успеси, „Кончар“ е незапирлив

Загрепската берза изминатата недела ја искористи за доделување награди на најуспешните учесници на пазарот за 2025 година. Особено беа истакнати компаниите кои се одлучија за иницијална јавна понуда, со што значително придонесоа за развојот на пазарот на капитал. Во тие трансакции учествуваа повеќе од десет илјади граѓани, што покажува растечки интерес за вложување во акции.

 

Дивиденди во Љубљана, обврзници во Белград

На Љубљанската берза неделата ја одбележаа вести од банкарскиот и енергетскиот сектор. НЛБ ја потврди исплатата на втората транша дивиденда, нудејќи им на акционерите атрактивен принос поголем од седум проценти. Фармацевтската компанија „Крка“ најави програма за откуп на сопствени акции, додека „Петрол“ доби зелено светло од Надзорниот одбор за амбициозна стратегија на раст до 2030 година, која предвидува проширување на бизнисот и зголемување на профитабилноста.

Во Белград, акциите и понатаму се во сенка на обврзниците. Минатата недела беше спроведено издавање на МРЕЛ (MREL) обврзници на „Уникредит банка“ од Србија, во вкупна вредност поголема од 50 милиони евра. Издавањето беше поддржано и од Европската банка за обнова и развој, што претставува значаен придонес за стабилноста и развојот на српскиот пазар на капитал.

 

 

Дали нè очекува оптимистички крај на годината?

Вкупното расположение на регионалните пазари е поделено. Загрепската, Белградската, Љубљанската и Сараевската берза забележаа маргинални позитивни поместувања, додека Бањалучката и Македонската завршија во благ минус. Се чини дека во тој дух пазарите и ќе ја заклучат годината, смета Милиќ.

Последниот месец во годината обично носи ‘Santa Claus Rally’, период на оптимизам и раст на цените на акциите. Оваа година тој засега изостана, главно поради претпазливоста на инвеститорите поврзана со ризиците од вложувања во инфраструктура за развој на вештачка интелигенција. Сепак, вчерашните податоци за инфлацијата во Соединетите Американски Држави, која беше пониска од очекуваната, им дадоа позитивен импулс на пазарите. Тоа буди надеж дека инвеститорите конечно би можеле да започнат со пооптимистични купувања и да поттикнат раст на самиот крај од годината.

Во неделата пред нас не се очекуваат значајни статистички објави од еврозоната, бидејќи Евростат мирува сè до средината на јануари. Од регионот, Народната банка на Македонија ќе ја објави одлуката за каматните стапки, додека во САД ќе се следи објавата на индексот на доверба на потрошувачите. По повеќемесечниот пад, податокот за пониска инфлација би можел да ги поттикне потрошувачите повторно да размислуваат за потрошувачка, што би било дополнителен позитивен сигнал за пазарите