Тајната служба застрела маж кој пукал во близина на Белата куќа, ранет случаен минувач

Американски тајни агенти застрелаа маж во близина на Белата куќа, откако отворил оган од пиштол, се наведува во соопштението на агенцијата.

Мажот извесно време се движел по улицата пред да ѝ пријде на полициската контролна точка, да извади пиштол од торба и да почне неселективно да пука, изјави лице запознаено со случајот, на кое му била загарантирана анонимност поради чувствителноста на истрагата.

Службениците возвратиле на огнот и го погодиле осомничениот, кој бил пренесен во локална болница, каде што подоцна починал, соопшти Тајната служба.

За време на пукањето бил погоден и еден случаен минувач. Не било јасно дали лицето било погодено од првичните истрели на осомничениот или во размената на оган што следела.

Осомничениот е идентификуван како 21-годишниот Насир Бест, според лицето запознаено со случајот. Тој и претходно имал инцидент со властите во близина на Белата куќа во јули 2025 година, кога бил уапсен поради незаконско влегување откако влегол во забранета зона на пешачка контролна точка, покажуваат судските документи.

Властите неколку недели претходно, во јуни 2025 година, присилно го задржале за психијатриска проценка откако го блокирал влезот за возила во комплексот на Белата куќа, според истите документи.

Пукањето се случило во близина на 17. улица и авенијата „Пенсилванија“, надвор од комплексот на Белата куќа.

Новинарите биле итно повлечени од тревникот на Белата куќа во зградата, додека комплексот накратко бил блокиран.

Повеќе од два часа пред инцидентот, директорот за комуникации на Белата куќа, Стивен Чунг, објавил дека претседателот Доналд Трамп се наоѓа во претседателската резиденција. Трамп бил единственото лице под заштита на Тајната служба во Белата куќа во моментот на пукањето, изјави лицето запознаено со случајот.

Директорот на ФБИ, Кеш Пател, објави на платформата Икс дека неговата агенција, исто така, ѝ помага на Тајната служба.

Саботниот инцидент се случи помалку од еден месец откако федерални агенти уапсија маж на вечерата на Здружението на дописници од Белата куќа поради обид за атентат врз Трамп. Осомничениот со огнено оружје се обидел да ја пробие безбедносната контролна точка.