Бил Гејтс пред Конгресот потврдил дека Епстајн имал намера да го уценува

Бил Гејтс пред американските законодавци изјавил дека верува оти Џефри Епстајн можеби размислувал да го уценува, според транскрипти објавени во вторникот.

Во сведочењето зад затворени врати на 10 јуни, Гејтс ги оспорил деталите што Епстајн ги запишал во електронски пораки до самиот себе во врска со вонбрачните афери на коосновачот на „Мајкрософт“. Тој изјавил дека Епстајн, пропаднат финансиер и сексуален престапник кој почина во затвор во Њујорк во 2019 година, потенцијално се обидувал да ги искористи тие информации, вклучувајќи „буквално десетици невистинити работи“, како средство за притисок.

„Не бев уценуван“, му рекол Гејтс на комитетот, но „кога ќе ги погледнете овие електронски пораки, знаете, изгледа дека размислувањата на господинот Епстајн оделе во таа насока“.

Гејтс изјавил дека директно разговарал со Епстајн за таа можност, особено додека се обидувал да ја прекине комуникацијата со него. Гејтс ги признал аферите, но рекол дека не бил поврзан со жените преку Епстајн. Гејтс повеќепати изјавил дека немал директни сознанија за злосторствата на Епстајн со малолетни жртви.

„Имаше таков прикриен начин на изразување, од типот: еј, сите треба да сакаме да бидеме пријатели“, рекол Гејтс. „Јас многу јасно му одговорив и реков: гледај, ако мислиш дека ќе извлечеш повеќе пари од ова, тоа нема да се случи, а ако тоа значи дека ќе излезеш и ќе зборуваш со луѓе за одредени работи, јас едноставно ќе ја поднесам таа болка и ќе се справам со неа.“

Неколку прашања биле насочени кон улогата што Епстајн ја имал во преговарањето за пакетот за заминување на Борис Николиќ, еден од најблиските советници на Гејтс. Гејтс изјавил дека Епстајн исто така барал филантропски донации во свое име, нешто за кое Гејтс рекол дека „јасно му ставил до знаење дека нема да го направи“.

Вклучувањето на коосновачот на „Мајкрософт“  - кој во тоа време беше еден од најбогатите луѓе во светот  - во кругот на Епстајн покажува колку широко било неговото влијание во високите кругови на финансии, технологија и академската заедница. Покрај Гејтс, комитетот што ги истражува злосторствата на Епстајн побарал сведочења и од Бил Клинтон, Хилари Клинтон, Леон Блек и Кетрин Румлер.

Гејтс јавно признал дека имал повеќе афери додека бил во брак со Мелинда Френч Гејтс, што придонело за нивниот развод по 27 години брак.

„Овие афери немаа никаква врска со моите интеракции со Епстајн, но беа болни за моето семејство“, рекол Гејтс во изјавата што ја подготвил за своето сведочење. „Како што јавноста сега може да види, врз основа на она што е објавено во документите, Епстајн работел на тоа да ги искористи информациите за моите неверства  - покрај многуте лаги што ги надоврзал  - за да изврши притисок врз мене повторно да воспоставам контакт со него.“

Гејтс ја ценел можноста да сведочи и го поддржува целосното објавување на документите поврзани со Епстајн, изјавил негов портпарол по објавувањето на транскриптот. Портпаролот додал дека Гејтс одговорил на секое прашање во текот на речиси шест часа и дека „со целосниот, нецензуриран транскрипт што сега е јавно достапен, секој може сам да ги разгледа деталите“.

Во своето сведочење, Гејтс рекол дека се сретнал со Епстајн меѓу 12 и 14 пати, како и дека имале два разговора преку Скајп, во период од четири години. Епстин почина додека чекаше судење по федерални обвиненија за сексуална трговија со малолетни девојчиња. Властите ја прогласија смртта за самоубиство.

Претставничката Емили Рендал, демократка од државата Вашингтон и член на Комитетот за надзор, изјави дека целта на комитетот е да обезбеди правда за преживеаните жртви. Напуштајќи ја салата каде што Гејтс сведочел претходно овој месец, таа рекла дека процесот бара испрашување и на луѓе кои можеби не учествувале директно во злосторствата на Епстајн, но во некои случаи биле „подготвени да свртат поглед“ од предупредувачките знаци.

„Господинот Гејтс беше отворен и кооперативен во одговарањето на прашањата, но мислам дека некои од неговите одговори ни покажуваат дека многу од мажите кои имале контакти со Џефри Епстајн го гледале само она што сакале да го видат во нивните интеракции со него“, изјавила Рендал.