Каква врска има серијата „Индустрија“ со документите на Епстајн?

Во февруари 2011 година, двајца вработени во „ЏП Морган“ (JPMorgan Chase & Co.) разговарале за една епизода од серијата „Ред и закон: Одделение за специјални жртви“ (Law & Order: Special Victims Unit). Епизодата со наслов „Лет“ („Flight“) се занимавала со измислен богат бизнисмен од одбранбената индустрија, Џордан Хејс, обвинет за сексуална злоупотреба на тинејџерка. На банкарите им било јасно на кого мислеле сценаристите: Џефри Епстајн.

„Го впишав ‘СВУ’ (Special Victims Unit - Одделение за специјални жртви) и неговото име, и ми излезе приказна на „Гавкер“ (Gawker): ‘Закон и ред“ ја одбележува склоноста на Епстајн кон тинејџерски проститутки’“, напишал еден од нив во мејл.

Епизодата била емитувана неколку недели откако њујоршки судија пресудил дека Епстајн треба да остане класифициран како сексуален престапник од трет степен. Заплетот имал многу јасни паралели со неуспешниот обид на правниот тим на починатиот педофил да му се ублажи статусот.

Од време на време, поп-културата испраќа ваков сигнал што инсајдерите го препознаваат. Додека ја гледав најновата сезона на „ХБО“ серијата „Индустрија“ (Industry), драма за светот на високите финансии сместена во Велика Британија, имав слично чувство како и тие вработени во „ЏП Морган“. Одредено ниво на заплетот во серијата впечатливо потсетуваше на случајот Епстајн, сличност што ми беше особено тешко да ја игнорирам бидејќи истовремено пишував неделни осврти за серијата и известував за вистинскиот скандал за Блумберг. Финалето беше емитувано во неделата, на 1 март.

Непосредно пред четвртата сезона да излезе во јануари, американското Министерство за правда почна да објавува дел од 3,5 милиони документи познати како документите на Епстајн. Заплетот за сексуална трговија и уцена со интимни содржини во „Индустрија“ се совпадна со нови откритија што првпат детално покажаа како посрамотениот финансиер водел индустриски разработена мрежа за сексуална злоупотреба на млади жени и малолетнички. Иако сценаристите не можеле да знаат многу од тие детали, продукцијата на сезоната завршила минатиот август, серијата морничаво прецизно ја реконструира моралната празнина на светот на елитните контакти на Епстајн.

Интересот за документите на Епстајн делумно го потхранува чувството дека добиваме нефилтриран увид во тоа како навистина се однесуваат некои луѓе на самиот врв на општеството. Сериите како „Индустрија“, а пред неа и „Наследници“ (Succession), нè привлекуваат затоа што создаваат впечаток дека однапред знаеме какви ќе бидат насловите во вестите.

Кит Харингтон глуми пропаднат бизнисмен и политичар, сер Хенри Мук. Depositphotos

 

Додека ги гледав падовите на ликовите во серијата, нивните можни прототипи се соочуваа со сопствени пресметки во реалниот свет. Една недела пред (спојлер!) пропаднатиот бизнисмен и политичар, Сер Хенри Мак (Кит Харингтон) да биде уапсен во финалето, Ендру Маунтбатен-Виндзор, поранешниот принц Ендру, бил задржан неколку часа од британската полиција поради прашања поврзани со обвинувања за злоупотреба на јавна функција. Обвинение не било поднесено. (Не одговорил на барањето за коментар.) Неколку дена пред емитувањето на финалето, лондонската полиција го уапсила поранешниот лабуристички политичар Питер Менделсон по слични обвинувања. Тој бил пуштен по неколкучасовно испрашување и не бил обвинет. (Ни Менделсон не одговорил на барањето за коментар.)

Вашата претплата не може да се зачува. Ве молиме обидете се повторно.

Вашата претплата е успешна.

Билтен

Вистинските одлуки започнуваат со вистински информации

Претплати се

Многу елементи од серијата се испреплетуваат со суровите општествени норми на светот на починатиот педофил. Она што провејува низ пораките на Епстајн е силно чувство на трансакција: влијателни луѓе си прават услуги еден на друг, очекувајќи подоцна да ги наплатат. Ништо не се прави бесплатно; пријателството, колку и да постои, се темели на размена на материјални користи.

Додека претходните сезони на „Индустрија“ се занимаваа со деталите од животот на банкари, трговци и брокери, најновата сезона се повлекува чекор наназад за да ја согледа целата структура на блиски врски што го поврзуваат лондонскиот Сити со британската политичка и аристократска елита. Таа поставува пошироки прашања за влијанието на естаблишментот кој често не извршува јавни функции, но може да има поголемо влијание од избраните функционери. Тоа силно одекнува во време на општо незадоволство од таквите врски во реалниот свет. Дури и додека формално бил во затворска ќелија во Флорида, луѓе се советувале со Епстајн за сè, од финансиски пазари до голем британски инфраструктурен проект.

Како што се појавија обвинувања дека искусниот британски политички оперативец Менделсон споделувал чувствителни информации со Епстајн, паралелите со „Индустрија“ станаа очигледни: селски забави, интимни разговори со сомнителни бизнисмени и фиктивен лабуристички министер кој наивно се обидува да изгради односи со нив, за на крајот да биде корумпиран. (Пред апсењето, Менделсон изјави дека жали за каква било поврзаност со Епстајн, но дека никогаш но дека никогаш не бил сведок на незаконски дејствија..)

Мариса Абела во фустан на Диор | Depositphotos 

Во серијата, како и во реалноста, гледаме како наизглед благородни намери, на пример поттикнување економски раст, можат да пропаднат. „Индустрија“ ниту се обидува да ги сокрие изворите на инспирација, отворено алудирајќи на германскиот скандал со „Вајркард“ (Wirecard) додека ја следи пропаста на измислената компанија „Тендер“.