Како се одвиваше борбата за спас на летот 1073 на „Флај Дубаи“

Патниците во авионот „боинг 737 макс“ (Boeing Co. 737 Max) се подготвувале за последниот час од летот од Дубаи до Тел Авив во средата наутро кога одеднаш избувнал хаос на небото над Саудиска Арабија.

Во пилотската кабина еден од пилотите го нападнал својот колега, прободувајќи го повеќепати со остар предмет, изјави подоцна израелскиот премиер Бенјамин Нетанјаху. Додека се одвивала шокантната сцена повеќето од околу 170-те патници не биле свесни за ситуацијата, бидејќи вратата на пилотската кабина го попречувала погледот кон предниот дел на авионот.

Меѓу луѓето во главната кабина, Натан Гремпел седел кон средината, во близина на крилото, враќајќи се дома во Израел преку Дубаи од патување во Јапонија со членови на своето семејство. Кога неговата сопруга и ќерка станале за да одат во тоалетот, забележале дека вратата на пилотската кабина е малку подотворена.

Внатре, кажа тој, едниот пилот го бодел другиот во вратот.

„Виделе дека нема никој на управувачот, нема пилот, и почнаа да врескаат“, објасни тој откако вечерта се вратиле во Тел Авив со лет за репатријација, придружувани од полицијата и поздравувани со овации од луѓето на земјата.

Прво еден патник истрчал до пилотската кабина за да ја прекине пресметката, а по него и друг, додека авионот почнал нагло да се спушта, изјави тој. Друг пилот, кој седел во задниот дел, исто така истрчал напред и ја презел контролата врз авионот, кажа Гремпел.

Пресметката во предниот дел на авионот го претворила она што требало да биде рутински лет, главно со израелски патници, во речиси катастрофално искуство. Откако избила тепачката во пилотската кабина, авионот се спуштил повеќе од 14.000 стапки (4.300 метри) за помалку од 30 секунди, пред да успеат повторно да го стабилизираат авионот другите пилоти што притрчале на местото.

Авионот подоцна извршил итно слетување во Табук, Саудиска Арабија, каде што напаѓачот, чиј идентитет не е објавен, бил испрашуван од локалните власти.

Нетанјаху го опиша настанот како сериозен безбедносен инцидент, припишувајќи им заслуга за присебноста и решителноста на патниците и екипажот што истрчале кон предниот дел на авионот и спасиле многу животи.

Фотографии споделени на социјалните мрежи ги прикажуваат пилотите на подот во близина на пилотската кабина, крвави и делумно соблечени за да ги третираат повредите. Некои патници исто така имале крв на облеката и крв што им се слевала по лицата, што било сведоштво за драмата што ненадејно се одвивала во воздухот.

И авионот имал знаци на оштетување. Фотографии од авионот откако слетал во Саудиска Арабија покажуваат дека кормилото на вертикалниот стабилизатор недостасува - оштетување што може да настане кога управувачките површини се поместуваат премногу агресивно при големи брзини.

Но тој дел од секундата, кога група луѓе одлучиле да преземат контрола врз авионот, исто така го претворил она што речиси сигурно би значело смрт и уништување во среќно спасување на луѓето во авионот.

„Тој нè спаси“, рече Гремпел за првиот патник што истрчал кон пилотската кабина.