Анемија на Македонската берза
Динамиката на тргување на Македонската берза чувствително забрза во февруари годинава, ама растот на вкупниот промет го билдаат блок трансакциите, кои ги немаше во првиот месец од годината. Поминаа два месеца берзанско тргување во кое за инвеститорите во Македонија важат нови даночни правила, па анализираме кои се клучните карактеристики на домашниот пазар на капитал во овој период.
Февруари е месец на објава на годишни извештаи и најави за исплата на дивидендите, но колку позитива на пазарот може да внесе добар резултат? Познавачите се сомневаат.
Според податоците од Македонската берза, од вкупно 91 котирано акционерско друштво (не се вклучени друштвата што се долгорочно суспендирани од котација) во текот на 2022 година, преку Системот за електронски информации за котирани акционерски друштва (СЕИ нет), 17 друштва објавиле донесена одлука за откуп на сопствени акции, а четири друштва објавиле известување за извршен откуп на сопствени акции во согласност со претходно донесена одлука. Анализиравме што се крие зад откупот на сопствени акции кај македонските компании.
ЕУ ќе ги продолжи мерките за штедење гас
Европската комисија ќе предложи продолжување на вонредните мерки за намалување на потрошувачката на гас до следната година за земјите од ЕУ да можат подобро да се подготват за претстојната зима. ЕУ сака да ги дополни своите магацини до 90 отсто пред следната зима.
Оваа зима ЕУ успеа да ја намали потрошувачката речиси за 20 проценти. Поради топлата зима резервите не се потрошија премногу, па во моментов се на ниво од нешто помалку од 60 отсто.
Русија уште ги користи „токсичните“ евро и долар
Плаќањата за извоз со тие што Банката на Русија ги нарекува „токсични“ валути, првенствено американскиот долар и еврото, учествуваа со 48 проценти од вкупниот износ на крајот на 2022 година, што е намалување од 87 отсто, колку што изнесуваше учеството на овие валути на почетокот на годината.
Иако обемот на трговијата што се врши со користење валути на наводните непријателски земји нагло се намали, Банката на Русија соопшти дека нивниот удел е сè уште значаен.
Уделот на јуанот се зголеми на 34 отсто од 0,5 отсто, а на руската национална валута, рубљата, отпаѓаат 16 отсто, покажува извештајот на руската централна банка.
На берзите...
Црвенило владее на светските берзи. Индексите го започнуваат последниот ден од тргувањето неделава со дебели минуси. Индексот S&P 500 и технолошкиот Nasdaq 100 паднаа за 1,8 процент, а на азискиот пазар, а кој денешното тргување одамна е во тек, поголемите индекси се во минус во опсег од еден до 2,5 проценти.
Нафтата е пред најголемата неделна загуба во последниот месец. Имено, ВТИ утрово се тргува по цена од 75,12 долари за барел, што е за 0,8 отсто пониско од вчера, а нафтата брент бележи пад од 0,5 проценти и барел чини 81,15 долари.
Курсот евро/долар е доста стабилен и денеска овие валути се тргуваат во сооднос 1,0588 долар за едно евро.
На криптопазарот најголемите токени ја продолжија низата загуби. Биткоинот падна под психолошката граница од 20.000, поточно загуби 1,3 отсто од вредноста и сега чини 19.967,16 долари, додека етерот падна за 0,9 отсто и се тргува по цена од 1.418,99 долари.
Денеска читајте...
Додека бизнис-секторот очајно се бори за работници и веќе долго повикува на зголемување на квотите за издавање дозволи за работа на странци, државата не прави ништо ниту за да го олесни интегрирањето на бегалците на пазарот на трудот, иако некои од нив сакаат да работат тука.
Неизбежно е отворањето на пазарот на трудот, сметаат експертите. И Владата најави увоз на работници. Но засега нема ништо видливо од реализацијата на идејата.
.webp){kind=icon}
