Земјите од Европската Унија лани произвеле вкупно 3,2 милијарди литри сладолед, што е зголемување за пет отсто во однос на претходната година.
Меѓу земјите oд блокот, Германија била главен производител на сладолед во 2022 година, со 620 милиони литри, а потоа следуваат Франција (591 милион литри) и Италија (571 милион литри).
Покрај тоа што е најголем производител на сладолед во 2022 година, Германија просечно го произведувала и најевтиниот сладолед, по цена од 1,5 евро за литар. Франција објави просечна цена од 1,9 евро за литар сладолед, додека кај Италија просечната цена е 2,3 евра.
Најскап сладолед се произведувал во Австрија, со просечна цена од седум евра за литар сладолед, потоа Данска (4,4 евра за литар) и Финска (2,8 евра за литар).
На Франција отпаѓа една петтина од извозот на сладолед надвор од ЕУ
Во 2022 година, земјите од ЕУ извезле 250 милиони литри сладолед во земји што не се членки на Унијата, со вкупна вредност од 930 милиони евра. Од друга страна, увозот на сладолед од земји што не се членки на блокот изнесува 61 милион литри, во вредност од 203 милиони евра. Количеството на увезен сладолед надвор од ЕУ е намалено за 14 отсто во 2022 година во однос на 2021 година, додека извозот е намален за само два отсто.
Франција во 2022 година извезла 53 милиони литри сладолед, што претставува 21 отсто од вкупниот извоз на сладолед надвор од ЕУ. Тоа ја прави најголем извозник на сладолед меѓу сите земји на ЕУ, пред Холандија (42 милиона литри сладолед; 17 отсто од вкупниот извоз надвор од ЕУ), Италија (31 милион литри; 13 проценти), Германија (28 милиони литри; 11 отсто) и Белгија (23 милиони литри; девет проценти).
.webp){kind=icon}
