Грчки брод што превезувал стока вчера бил погоден со проектил во Црвеното Море. Состојбата се комплицира, испораките доцнат, а трошоците за транспорт растат. Нападите на Хутите, бунтовничката група од Јемен, врз товарните бродови во Црвеното Море стануваа нов предизвик за глобалната економија. Македонската економија нема да остане имуна на овој, нов, проблем.
Добро утро, ова се петте вести кои се важни за почеток на овој ден
Македонските компании ги чувствуваат последиците од конфликтот во Црвеното Море
Кризата со бродскиот транспорт во Црвеното Море веќе почнаа да ја чувствуваат и македонските компании. Нарачките доцнат, трошоците се зголемуваат. Избегнувајќи го теснецот Бал ел-Мандеб на влезот на Црвеното Море поради напади од Хутите, бродовите на транспортните компании се насочија кон алтернативни маршрути,
Зголемените трошоци за нафта и пристанишните такси предизвикаа драстичен раст на цената на бродскиот транспорт, што на крајот ќе се рефлектира на цените на крајните производи, предупредуваат компаниите за бродско-контејнерски превоз на стоки во Македонија.
Може ли геополитичките тензии да ја „потопат“ трговијата меѓу Македонија и Кина?
Вооружените напади што го отежнуваат транспортот преку Црвеното Море, рута која меѓу другото важи за главна артерија во трговските врски меѓу азиските земји и Европа може да влијаат и врз трговијата меѓу Македонија и Кина, која од година во година е во континуиран пораст.
Во периодот јануари-ноември 2023 година трговските односи меѓу двете земји достигнаа вредност од над милијарда евра, од кои само 94 милиони евра отпаѓаат на македонскиот извоз во Кина, а останатите 925 милиони евра се увоз од Кина во земјава. Всушност, во изминативе години Кина од незначаен трговски партнер прерасна во земја која редовно е на листата пет најголеми трговски партнери на Македонија.
Очекувањата на пазарите за намалување на стапките се претерани, вели Гопинат од ММФ
Очекувањата на пазарот дека каматните стапки ќе бидат брзо намалени се избрзани бидејќи борбата против инфлацијата сè уште не е завршена, изјави претставничката на Меѓународниот монетарен фонд (ММФ), Гита Гопинат. Говорејќи на Светскиот економски форум во Давос, извршната директорка на фондот рече дека по наглото зголемување на трошоците за задолжување во последните две години, работата сè уште не е завршена бидејќи пазарите на трудот остануваат силни на двете страни на Атлантикот.
„Пазарите очекуваат централните банки доста агресивно да ги намалат каматните стапки – мислам дека е премногу рано да се донесе таков заклучок“, рече таа. „Треба да очекуваме намалување на каматните стапки годинава, но врз основа на податоците што ги имаме, очекуваме дека тоа е поверојатно да се случи во втората половина од годината“.
Во кеш може да се плати само до 2.000 евра, в година лимитот ќе биде 1.000 евра
Според членот 204 од Законот за спречување на перењето пари и на финансирањето тероризам, лимитот за готовински плаќања во износ од 3.000 евра или повеќе во денарска противвредност, во форма на една или повеќе очигледно поврзани трансакции, кои не се извршени преку банка, штедилница или преку сметка во друга институција што дава платежни услуги, се намалува на износ од 2.000 евра почнувајќи од 1.1.2024 година, додека од први јануари 2025 година граѓаните ќе може да плаќаат во кеш максимум 1.000 евра.
„Ова ќе значи извесен притисок врз истиснувањето на готовината од оптек. За сите плаќања каде што добрата или услугите се над сума од 2.000 евра ќе треба да се користи банкарски начин на плаќање, односно оние што имаат легални пари на легални сметки ќе може да плаќаат. Секако, ќе треба да има и соодветни контроли од УЈП, пазарна инспекција и финансиска полиција за да има ефикасност оваа мерка, бидејќи готовината е главен извор за нелегалната економија“, вели Павле Гацов, директор на „Про агенс“, во интервју за „Блумберг Адрија“.
Ништо лично, заменет си со дигитален близнак
Микела Соуса, позната како Лил Микела, е тинејџерски поп-феномен. Оваа 19-годишна, половина Бразилка, половина Шпанка, е модна инфлуенсерка, поп-ѕвезда и борец за општествени промени. Моментално има 2,6 милиони следбеници, а нејзината голема популарност некогаш ѝ обезбеди место меѓу „25-те највлијателни луѓе“, според магазинот „Тајм“, во 2018 година. Исто така, Микела соработувала со модни брендови како „Прада“, „Келвин Клајн“ и други. Сепак, Микела Соуса не е човечко суштество.
Во извештајот за трендовите на Инстаграм за 2023 година се тврди дека виртуелните инфлуенсери имаат подобар ангажман на нивните следбеници поради следните фактори: подобриот изглед на содржината, целосната контрола на содржината од страна на брендовите и растечкиот пазар на дигиталната мода.
.webp){kind=icon}
