Доминација на „Опенхајмер“ на 96. доделување на „оскарите“

Американската Академија за филмски уметности и науки ги додели „оскарите“ на свеченоста што се одржа утрово во театарот „Долби“ во Лос Анџелес. Филмот „Опенхајмер“ (Oppenheimer) триумфира со седум освоени награди, од вкупно 13 номинации. Водител на шоуто беше комичарот Џими Кимел.

„Опенхајмер“ на годинашното, 96-то доделување на „оскарите ги доби признанијата за најдобар филм, машка главна улога (Килијан Марфи), машка споредна улога (Роберт Дауни Џуниор), режисер (Кристофер Нолан), како и најдобра кинематографија, монтажа и филмска музика.

Вредните статуетки за главна и споредна женска улога отидоа кај Ема Стоун за филмот „Кутрите“ (Poor Things) и Дејвин Џој Рендолф за „Останатите“ (Тhe Holdovers). „Кутрите“ ги освои и трите „оскари“ за продукциски дизајн, шминка и фризура и за костимографија.

МИА

Најдобро оригинално сценарио, според Академијата, е она за „Анатомија на падот“ (Anatomy of a Fall) на француската режисерка-сценаристка Жустин Трије. Најдобро адаптирано сценарио има филмот „Американска фикција“ (American fiction) на Корд Џеферсон.

„Оскарот“ за најдобар филм од неанглиско говорно подрачје го доби „Зоната на интерес“ (The Zone of Interest), продуциран во Обединетото Кралство и во Полска. Ова остварување ја освои и наградата за звук.

Наградата за најдобри визуелни ефекти ја доби филмот „Годзила минус еден“ (Godzilla Minus One) од Јапонија.

Најдобра филмска песна е „What Was I Made For?“ на Били Ајлиш од филмот „Барби“ (Barbie).

Најдобар анимиран филм, според американската Академија, е јапонскиот „Момчето и чапјата“ (The Boy and the Heron). Најдобар краток филм е „Прекрасната приказна на Хенри Шугар“ (The Wonderful Story of Henry Sugar). За најдобар анимиран краток филм е прогласен  „Војната е завршена“ (War Is Over!).

Наградата за документарен филм му припадна на режисерот Мстислав Чернов за „20 дена во Мариупол“ (20 Days in Mariupol). Најдобар краток документарец е „Последниот дуќан за поправки“ (The Last Repair Shop) на Бен Праудфут и Крис Бауерс.  

Во моментов нема коментари за веста. Биди прв да коментира...

Остави коментар