Барбенхајмер не е само мемe. Има многу докази дека луѓето ширум светот прават планови да гледаат два од најочекуваните филмови за ова лето - кои се во целосен контраст еден од друг - во ист ден.
Британскиот синџир на кина „Вју“ (Vue) вели дека од вторникот, 19 отсто од луѓето што резервирале билети за да го гледаат „Опенхајмер“ (Oppenheimer) на режисерот Кристофер Нолан, купиле билети и за „Барби“ (Barbie) на Грета Гервиг.
„Поставивме што е можно повеќе проекции на двата филма за да одговориме на големата побарувачка“, вели Роб Леа, шеф на репертоарот за Британија и Ирска во „Вју“, еден од најголемите синџири на киносали во Британија со повеќе од 870 екрани.
АМЦ (AMC Entertainment Holdings Inc.), најголемиот синџир за филмови во светот, вели дека повеќе од 20.000 негови членови веќе резервирале билети за „Барби“ и „Опенхајмер“ во ист ден.
„Актуелната онлајн дебата околу овие два неверојатни филма се претвора во продажба на билети“, вели Елизабет Френк, извршна потпретседателка на светската програма и главна директорка за репертоар во AMC Theatres. Веројатно продажбата ќе биде и поголема пред објавувањето на 21 јули, рече таа.
„Барби“ се стреми да продаде повеќе билети во целина, при што најниските проценки од бокс офисот (Box Office Pro.) покажуваат најмалку 85 милиони долари во првиот викенд на прикажување за поп приказната, во споредба со 45 милиони долари за „Опенхајмер“.
„Алмо Дафтхаус“ (Alamo Drafthouse), американскиот синџир на кина познат по тоа што служи вечера и пијалоци за време на своите филмови, гледа побарувачка за „Барбенхајмер“ во бизнисот со приватни настани, каде се издаваат екрани за корпоративни настани и приватни собири како роденденски забави.
„Барања за изнајмување простории за двојно прикажување за 'Барби' и 'Опенхајмер' пристигнуваат со месеци“, вели Ник Исани, менаџер за продажба и организација на приватни настани за источниот брег на САД во „Алмо Дафтхаус“. Тој вели дека имало „значителен број“ барања за прикажување на двата филма на приватни настани како забави, и дека е уникатно искуство да се примаат барања за двојна проекции на филмови кои навидум се толку различни.
Филмот за бомбата и другиот за куклата навидум не изгледаат дека имаат заеднички карактеристики за прикажување. „Опенхајмер“ на Нолан е тричасовен драмски еп со Р рејтинг, додека „Барби“ на Грета Гервиг е фантастична, пластична ПГ-13 комедија која трае нешто помалку од два часа. Но, уште од објавата дека двата филма ќе бидат објавени во ист ден, двојката е голема интернет шега што се манифестира во мемиња и сувенири.
„Возбудата околу 'Барби' и 'Опенхајмер' е нешто навистина интересно“, вели критичарката Хана Флинт, авторка на „Силен женски лик: Што нè учат филмовите“ (Strong Female Character: What Movies Teach Us). Таа вели дека треската се должи на силата на филмаџиите и актерите вклучени во филмовите, и вели дека е впечатливо што луѓето посветуваат цел ден на два филма во ера кога многумина се жалат дека филмовите се предолги или велат дека повеќе би сакале да уживаат во ТВ серии отколку да гледаат долгометражен филм.
Флинт ги гледа филмовите рано на проекциите за медиумите, но вели дека ако сака да направи двојна претстава, прво би го гледала „Опенхајмер“, а потоа „Барби“ како „десерт“ за да го заврши денот.
„Мојот совет би бил луѓето да одат да ги изгледаат двата филма во ист ден“, изјави Килијан Марфи кој ја толкува главната улога во „Опенхајмер“, за шпанска „Ла Вангардија“ (La Vanguardia). „Ако се добри филмовите, тоа е општа победа за киното“.
А на киното добро би му дошла победа. Ова беше тешко лето за филмската индустрија, која можеби единствена потпора има во „Барби“, „Опенхајмер“ и најновиот филм „Невозможна мисија“ на Том Круз.
.webp){kind=icon}
