text size
Пратеничката група на СДСМ и коалицијата вчера до Собранието поднесе предлог-закон за изменување и дополнување на Законот за ДДВ, со кој бара намалување на данокот за струја од 18 на пет проценти и укинување на ДДВ за основните прехранбени производи, кој инаку е пет отсто.
„За сметка за електрична енергија од 3.000 денари, граѓаните ќе заштедат околу 400 денари – износ што, наместо да оди во државниот буџет, ќе остане во семејните буџети. Додека, пак, укинувањето на ДДВ за основните прехранбени производи ќе ја поевтини храната“, рече пратеникот од СДСМ Фатмир Битиќи.
Македонскиот БДП ќе останеше без колено да не беа парите од иселениците
Статистичките податоци од Народната банка покажуваат дека во периодот јануари-септември лани во земјава стигнале вкупно нешто над 1,5 милијарда евра како дознаки од работниците во странство преку официјалните канали или во готовина. Во истиот период од 2023 година оваа ставка изнесувала 1,56 милијарда евра.
„Споредено со истиот период од претходната година се забележува одредено намалување (за 4,2 проценти на годишна основа). Тоа е резултат на особено високата базна основа во првите три квартали од 2023 година, кога беше регистриран историски највисок износ“, образложуваат од Народната банка во одговор за „Блумберг Адрија“, додавајќи дека дознаките од работниците од странство се релативно стабилна категорија на девизен нето-прилив во земјата и во просек изнесуваат околу 14 проценти од БДП, а со тоа се битна поддршка на девизните резерви и стабилноста на курсот.
Македонија, по Србија, со највисоки камати за штедење во регионот
Штедачите во Србија имаат најповолни стапки на штедење, покажува анализата на податоците на локалните централни банки во пет држави од регионот Адрија. Просечната каматна стапка на новопримените депозити кај нашиот северен сосед била 3,2 отсто во последниот квартал лани, а веднаш потоа следуваат македонските банки, со 2,8 отсто, пред босанско-херцеговските со 2,1 отсто и хрватските и словенечките, со по 1,8 отсто.
Споредбата на овие бројки со оние од пред пет години покажува дека за тоа време каматите на штедење пораснале за повеќе од двојно, при што најголем скок има во двете членки на ЕУ, Хрватска и Словенија.
Еврокомесарот Шефчович оди во Вашингтон да преговара за трговските односи меѓу ЕУ и САД
Еврокомесарот за трговија и економска сигурност Марош Шефчович отпатува за Вашингтон на разговори со претставници од новата администрација на САД околу трговските односи меѓу ЕУ и САД.
Според него, ЕУ е подготвена да преземе мерки за намалување на суфицитот во трговската размена со САД, кој лани достигна околу 50 милијарди евра, факт што постојано го повторува американскиот претседател Доналд Трамп кога говори за односите со Унијата и „потребата од пофер однос“ на блокот кон неговата земја. Тој најави дека ЕУ е подготвена и да ја намали својата царина за увоз на автомобили, како и дека блокот е расположен да ја зголеми набавката на американски стоки, пред сѐ на течниот природен гас и сојата.
Тимот на Маск се обидува да дојде до податоци за даночните обврзници
Одделот за контрола на владините трошења (Department of Government Efficiency – DOGE) на Илон Маск се обидува да пристапи до многу податоци за даночните обврзници, вклучувајќи и податоци за поединци, според лице запознаено со ова прашање. Тоа ги поттикна демократските пратеници да изразат загриженост во врска со прашањата за приватност.
Тимот на Маск ги бара податоците, но сè уште нема пристап до нив, рече лицето, кое побара да остане анонимно. САД имаат строги закони што забрануваат откривање информации за даночните обврзници, иако постојат исклучоци за спроведување на законот.
Сите новитети во Формула 1
Во март се враќа најбрзиот циркус на светот, кој носи многу новини. Новата сезона во Формула 1 ќе биде понеизвесна од кога било, што е најважната вест. Има и неколку нови стратегиски цели, промени во составите, календарот, како и неизбежни законодавни иновации.
Формула 1 има цел да стане јаглеродно неутрална до 2030 година. Тоа вклучува намалување на емисиите во сите аспекти на спортот, од логистика до операции на патеката. Тие планираат да ја елиминираат пластиката за еднократна употреба и да се погрижат целиот отпад повторно да се користи, рециклира или компостира. За сите промени читајте во текстот на „Блумберг Адрија“.
.webp){kind=icon}
