Американски парадокс и регионални победници - пет вести на денот

Еден од големите парадокси на нашето време е тоа што Американците никогаш не биле побогати, а имаат негативен став кон економијата како никогаш досега.

Не се случило толку многу луѓе да припаѓаат на повисоката средна класа, а дури и Американците со пониски приходи се побогати според речиси сите мерила во споредба со претходните генерации. Сепак, повеќе од три петтини од Американците велат дека економијата не функционира во нивна корист. 

Добро утро! Ова се петте вести што треба да ги знаете на почетокот на денот, во избор на дигиталната редакција на „Блумберг Адрија“ од Скопје.

Колку ќе заработевте од 10-те регионални акции што ги издвоивме за 2026?

На почетокот на 2026 година, идентификувавме десет компании во регионот Адрија на кои веруваме дека треба да се обрне внимание. Клучните двигатели за 2026 година беа јасно дефинирани: масовни инвестиции во енергетски мрежи и центри за податоци, забрзана дигитализација на јавниот и финансискиот сектор, реновирање на транспортната и логистичката инфраструктура, како и зголемена побарувачка за дефанзивни сектори со релативно високи дивиденди, како што се банкарството и фармацевтската индустрија. Компаниите кои се директно позиционирани во овие сегменти имаат предност не само во растот на приходите, туку и во стабилноста и вреднувањето на паричниот тек.

На половина од годината сме и повторно преиспитуваме какви се моменталните резултати. Да заклучиме со тениски вокабулар - шест наспроти четири за аналитичкиот тим. 

Зошто макроекономските искушенија не ја спречија романската берза?

Романската економија неодамна се соочува со низа предизвици што вршат притисок врз економскиот раст и ја зголемуваат неизвесноста кај инвеститорите. Високата инфлација, политичката нестабилност и загриженоста за јавните финансии создаваат сè посложена средина за бизнис и трошење. Сепак, и покрај послабата макроекономска слика, романскиот пазар на капитал продолжува да бележи силен раст, а инвеститорите очигледно не го делат целосно песимизмот што произлегува од економските индикатори. 

Таквата несразмерност помеѓу движењето на економијата и пазарот на акции го поставува прашањето што точно стои зад овој раст. Дали е тоа очекување за закрепнување, привлечни вреднувања или пазарот едноставно гледа преку моменталните проблеми и го цени долгорочниот потенцијал на романската економија?

Нова опсесија на генерацијата зед - штедат за што порано да заминат во пензија

Во време кога многу припадници на генерацијата зед се впуштаат во ризични инвестиции, како што се пазарите за прогнози и криптовалутите, дел од нив избираат сосема поинаков пат. Тие отвораат сметки за пензиско штедење многу порано од претходните генерации и секоја година го уплаќаат максимално дозволениот износ. Генерација позната по трендовите за максимизирање на изгледот и животниот стил, сè повеќе се насочува и кон максимизирање на пензиските заштеди.

Некои од овие млади штедачи се дел од интернет-движењето FIRE (financial independence, retire early / Финансиска независност, рано пензионирање), чија цел е уште во првите години од кариерата да заштедат и инвестираат доволно за да можат да се пензионираат многу пред вообичаената возраст од 65 години. Други, пак, само сакаат да бидат финансиски сигурни и спокојни кога ќе дојде времето за пензија, без оглед на тоа што ќе се случува со системот за социјално осигурување. Многумина сакаат и доволно финансиска резерва за никогаш да не бидат принудени да останат на работа што не ја сакаат.

Ќе изгуби ли „Дипсик“ значајни инвестиции поради контроверзни коментари?

„Дипсик“ (DeepSeek) им соопштил на потенцијалните инвеститори дека привремено го запира процесот на собирање капитал во втората рунда на финансирање, според извори запознаени со ситуацијата.

Одлуката дојде само неколку дена откако изјавите на основачот Лианг Венфенг за конкуренцијата меѓу САД и Кина во развојот на вештачката интелигенција (ВИ) станаа вирални.

Кинеската компанија усно ги информирала дел од инвеститорите дека во следните денови нема да потпишува инвестициски договори, иако тоа претходно било очекувано. Сепак, процесот би можел да продолжи во подоцнежна фаза.

Објавите во медиумите за ставовите на Лианг наводно се една од причините за паузата. Тој, според кинеските медиуми, зборувал за зависноста на развојот на ВИ од чиповите на „Енвидија“ (Nvidia) и за тоа дека Кина сè уште заостанува зад САД во технолошкиот напредок.

Зошто новите царини на Трамп се фокусираат на принудната работа?

Администрацијата на Трамп најде нов начин да воведе царини за 60 земји од кои доаѓа речиси целиот американски увоз - да ги обвини дека не ги спроведуваат забраните за увоз на странски производи произведени со принудна работа.

Овие царини, кои стапија на сила во петокот, ќе создадат нова трговска бариера која би можела да биде помалку ранлива на правни оспорувања отколку „реципрочните“ царини на Трамп, кои беа претставени во април минатата година, а Врховниот суд ги поништи во февруари.

Американската влада соопшти дека засегнатите земји или немаат забрана за увоз на производи произведени со принудна работа, или не ги спроведуваат соодветно таквите забрани. Нејзиниот аргумент не се темели на човековите права: се смета дека земјите кои не го блокираат увозот на производи произведени со принудна работа имаат неправедна конкурентска предност.