Енергија од отпад: Етиопија научи како, Македонија сѐ уште не - пет вести на денот

Трговската војна меѓу САД и ЕУ се разгорува. Европската Унија почна да работи на воведување контрамерки против новите американски царини за метали, а планот е да наметне свои давачки за американските стоки во вредност од 26 милијарди евра (28,3 милијарди долари).

Откако САД воведе царини од 25 отсто за увозот на европски челик и на алуминиум, ЕУ најави царини за повеќе американски производи, вклучително челик, алуминиум, текстил, виски, земјоделски производи, апарати за домаќинство, мотори и чамци. Дел од времено суспендираните царини ЕУ ќе ги вратат во сила на крајот на март, а новите се очекува да бидат усвоени кон средината на април.

Енергија од отпад: Етиопија научи како, Македонија сѐ уште не

Во 2018 година Етиопија стана првата земја во Африка во која преку преработка на отпад се добива енергија. Европа со децении ги ползува придобивките од соодветно третирање и искористување на отпадот. На континентално ниво постојат над 500 постројки коишто произведуваат електрична, а некои и топлинска енергија од отпадот.

Македонците речиси сиот комунален отпад го фрлаат на депонии, а целта на државата е 25 отсто од тој отпад да служи за производство на енергија. „Во моментот, ова значи дека во Македонија минимум 113.193 тони завршуваат на нестандардните депонии наместо да се користат за енергија. Дополнително на ова треба да се земе во предвид фактот дека ова не е целата количина на создаен отпад“, велат од Министерството за животна средина, од каде претпоставуваат дека во пракса станува збор за најмалку двојно поголема количина.

Кои се македонските компании што имаат средства од 4,1 милијарди евра?

Вo четвртиот квартал на 2024 година, вкупните средства на останатите финансиски институции (ОФИ) достигнаa ниво од 255,2 милијарди денари (4,15 милијарди евра), што претставува квартален раст од 12,4 милијарди денари (202 милиони евра), покажуваат новите податоци на Народната банка. Тие учествуваат со 21,2 проценти во вкупните средства на финансиските институции во земјава.

Во рамките на структурата на останатите финансиски институтции, најголемо учество од 65,5 проценти во вкупните средства имаат пензиските фондови, по што следуваат осигурителните друштва со учество од 14,6 проценти. 

Народната банка ја задржа каматата на благајничките записи на 5,35 проценти

Извршниот одбор за поставеноста на монетарната политика на Народната банка одлучи каматната стапка на благајничките записи да остане на нивото од 5,35 проценти, а каматните стапки на депозитите преку ноќ и на седум дена на нивоата од 3,95 проценти и 4 проценти, соодветно.

„Со ваквата одлука се задржува внимателниот карактер на монетарната политика. И натаму се очекува дека нивото на каматните стапки, заедно со досегашните промени кај задолжителната резерва и преземените макропрудентни мерки ќе придонесат за ценовна стабилност на среден рок и за стабилноста на девизниот курс на денарот во однос на еврото“, наведуваат од Народната банка.

Европа ги зголемува трошоците за одбрана, „Рајнметал“ ја зголемува продажбата

„Рајнметал“ (Rheinmetall AG) предвидува дека приходите и оперативната добивка ќе продолжат да растат годинава, додека германскиот производител на оружје го користи растот на европските трошоци за одбрана.
Производителот на оклопното возило „боксер“ (Boxer) предвидува дека приходите ќе се зголемат за 25-30 проценти, додека оперативната маржа ќе биде околу 15,5 проценти. Во главната област на нивното работење, во секторот за одбрана, растот на приходите ќе достигне дури 40 проценти.

„Започна нова ера на вооружување во Европа, која ќе бара многу од сите нас“, рече извршниот директор Армин Папергер. Цената на акциите на компанијата се зголеми за над 1.000 проценти од почетокот на војната во Украина

Како се финансираат тимовите во Формула 1?

Претстојниот викенд ќе започне 76-та сезона на престижната Формула 1, и тоа во австралиската метропола Мелбурн. Оваа сезона се состои од рекордни 24 трки, а наедно е и прва сезона од 2019 година што започнува во Австралија.

Формула 1 (Ф1) не е само возбудлив спорт на брзина и прецизност туку е и џиновска деловна империја во која се вртат милијарди долари. Тркачкиот шампионат, во сопственост на американската медиумска компанија „Либерти медиа“ (Liberty Media), забележа приходи од 3,6 милијарди долари во 2024 година, што е зголемување од 11 отсто споредено со претходната година, кога тие изнесуваа 3,2 милијарди долари.