Студентите од УКИМ ќе организираат собири цела недела, во Кочани најавен протест

По трагичниот настан во дискотеката во Кочани, во кој животот го загубија 59 лица, а над сто се хоспитализирани, на социјалните мрежи се шири повик за протест.

Протестот е закажан во 13 часот во Градскиот парк во Кочани.

„Граѓаните бараат конкретни промени. Ќе се борат за град без партиски вработувања, за институции што функционираат, за полиција што  е тука за нас, за инспекциски служби што ќе ги вршат своите обврски, за јавни простори што ќе бидат безбедни и чисти. Протестот е за правдата, за секој од нас, за секоја жртва што ја изгубивме и за сите нас што го живееме овој град секој ден“, се наведува во објава на Фејсбук.

Во меѓувреме и студентите од универзитетот „Св. Кирил и Методиј“ од Скопје (УКИМ) денеска, во 12 часот, на платото на универзитетот ќе одржат организиран заеднички час за искажување сочувство кон жртвите што настрадаа во вчерашниот пожар во дискотеката „Пулс“ во Кочани.

Како што соопштија од Универзитетско студентско собрание при УКИМ, на заедничкиот час ќе им се даде и поддршка за побрзо закрепнување на повредените.

Од Универзитетско студентско собрание најавуваат дека заедничката настава и собирите ќе продолжат секој ден сè до 21 март.

„Дополнително, ги повикуваме сите студенти на УКИМ и целата академска заедница во текот на целата недела да присуствуваат на организирани собири низ кампусите на УКИМ, за оддавање почит и изразување поддршка за жртвите на трагичниот пожар“, се наведува во соопштението објавено на социјалните мрежи. 

Во него се додава дека ќе има дополнителни информации во однос на локациите и времето на собирите.

Во моментов нема коментари за веста. Биди прв да коментира...

Остави коментар