Накратко од светот: Царините од 50 отсто и „Енвидија“ го тресат пазарот

Трговските тензии меѓу САД и остатокот од светот се заоструваат. Европската Унија го брани правото на дигитален данок, Индија трпи последици поради соработката со Русија, а американскиот претседател Доналд Трамп влегува во уште еден институционален судир – овој пат со Федералните резерви (Фед). Освен политичките неизвесности, на движењата на светските пазари влијае и очекуваниот финансиски извештај на „Енвидија“.

 

Еве преглед на главните светски вести за ова утро:

ЕКОНОМИЈА

ЕУ застана во одбрана на дигиталниот данок

ЕУ ги критикуваше тврдењата на претседателот Трамп дека дигиталните прописи во странство се неправедни – само еден ден откако Трамп се закани дека ќе воведе царини и други казни за земјите што ги оданочуваат онлајн услугите.

„Суверено право на ЕУ и нејзините земји членки е да ги регулираат економските активности на сопствената територија во согласност со нашите демократски вредности“, изјави портпаролката на Европската комисија, Паула Пињо, во Брисел.

Да потсетиме, Трамп, без да наведе конкретна влада, се закани со повисоки царини и ограничувања на извозот на напредна американска технологија и чипови, како одмазда за даноците на дигиталните услуги што се наметнати врз американските компании.

Царините од 50 отсто за Индија стапија во сила

Во средата стапија во сила американските царини од дури 50 отсто на одредени производи од Индија, затоа што САД сакаат да ја казнат земјата поради купување руска нафта. Тоа значи дека постојната царина од 25 отсто на индискиот извоз е удвоена, што ќе внесе дополнителен удар во односите меѓу двете земји.

Еве како тензиите во односите со САД може да ја турнат Индија кон Кина.

 

Трамп започнува историска правна битка

Во меѓувреме Трамп порача дека е подготвен за правна битка со гувернерката на Фед, Лиза Кук, откако презеде чекори за нејзино разрешување поради обвинувања дека фалсификувала хипотекарна документација.

Од Фед порачаа дека ќе ја почитуваат секоја судска одлука во рамките на правниот процес во кој Кук ја оспорува смената што претседателот на САД се обидува да ја спроведе.

 

БЕРЗИ

Европа

Со европските фјучерси утрово се тргува со добивки. Да потсетиме, европските берзи во вторникот завршија во минус, при што најголем пад имаа акциите во Франција.

Главниот француски берзански индекс опадна за 1,7 отсто, откако трите главни опозициски партии соопштија дека нема да ја поддржат владата на гласањето за доверба најавено од премиерот Франсоа Бајру на 8 септември.

САД

Од другата страна на Атлантикот, американските фјучерси растат, додека инвеститорите ги очекуваат деловните резултати на „Енвидија“ (Nvidia), кои ќе бидат објавени по затворањето на берзите во САД. Се очекува „Енвидија“ да даде нови информации за ширење на инвестициите во вештачка интелигенција, како и квартален приход од 46 милијарди долари, што би претставувало годишен раст од 54 отсто. Инвеститорите исто така ќе се фокусираат на проекциите за продажба во Кина, откако таа земја неодамна го продолжи трговското примирје со САД.

 

Азија

Во исто време акциите во азиско-пацифичкиот регион се на стабилно ниво. Пред извештајот на „Енвидија“, пораснаа акциите на технолошките компании во Азија, при што акциите на јапонскиот „Никон“ скокнаа за 21 отсто.

Во моментов нема коментари за веста. Биди прв да коментира...

Остави коментар