Просечната месечна исплатена нето-плата по вработен, во ноември 2025 година, изнесува 45. 961 денар, што е зголемување за 9,4 проценти во однос на ноември 2024 година, соопшти Државниот завод за статистика.
Најголем раст на просечната месечна исплатена нето-плата по вработен има во секторите: административни и помошни услужни дејности, здравствена и социјална заштита, како и во трговијата на големо и мало.
Добро утро, следуваат останатите вести кои се важни за почеток на денот.
Дали и какви дивиденди може да се очекуваат од македонските блучипови?
Инвеститорите во акциите на компаниите кои се дел од македонскиот берзански индекс МБИ10 деновиве се во исчекување на објавата на финансиски резултати за 2025 година од кои ќе може да се насети какви би можеле да бидат нивните дивидендните политики. Главните прашања се дали воопшто ќе има исплата на дивиденда и дали може да се очекува зголемување на износот во однос на претходната година?
Читајте ја нашата анализа за работата на компаниите во минатата година.
Зошто силниот раст на среброто не значи дека е метал на кој треба да му се верува?
Од почетокот на годината среброто е во плус од 30 проценти, а тој пораст е продолжение на трендот од минатата година, кога белиот скапоцен метал сјаеше посилно од златото, со скок од дури за 140 проценти. Сепак, иако среброто успеа да го загрее интересот на инвеститорите во рекордно време - особено на тие кои го гледаат како мултифункционална алатка за инвестирање - сега се поставува прашањето дали среброто е сè уште рационален избор или пазарот влегол во „прегреаната“ зона.
За нашите богаташи не е сѐ само во акции, има нешто и во луксузните чанти и часовници
Според извештајот за богатството (Wealth Report 2025) на консултантската куќа „Најт Френк“ (Knight Frank), 78 отсто од анкетираните 600 ултрабогати лица (со нето-богатство проценето над 30 милиони долари) рекле дека инвестираат во луксузни колекционерски предмети, што е раст од шест отсто во споредба со 2024 година. Во просек, овие инвестиции сочинуваат 8-12 отсто од нивните портфолија, со вкупна вредност на глобалниот пазар за инвестиции во луксузни добра проценета на 1,5 билион долари во 2025 година, што е пораст од седум отсто.
Властите во Гренланд со повик до луѓето да се подготват за можна инвазија
Премиерот на Гренланд, Јенс-Фредерик Нилсен, истакна дека иако воената инвазија не е најверојатна, не може да се исклучи како можност. На прес-конференција во главниот град Нук, Нилсен соопшти дека владата ќе формира специјална работна група што ќе се состои од претставници на сите локални власти и институции, кои ќе работат на подготовката на населението за евентуални нарушувања. Оваа група ќе издаде нови упатства, меѓу кои и препорака да се има доволно храна за најмалку пет дена складирана во домовите.
Тензии меѓу САД и Европа во Давос - Лагард револтирано напуштила свечена вечера
Претседателката на Европската централна банка, Кристин Лагард, ненадејно напуштила ексклузивна вечера во Давос откако американскиот министер за трговија Хауард Лутник почнал да зборува за Европа, според луѓе запознаени со ситуацијата.
На ВИП-настанот во вторникот вечер присуствувале повеќе од сто луѓе, а Лутник бил последен говорник. Говорот на Лутник пред гостите на вечерата ги омаловажил европските економии и нивниот недостиг од конкурентност во споредба со моќта на САД. Тоа предизвикало неколку Европејци во просторијата да се почувствуваат непријатно, а како што ескалирале критиките, Лагард била видена како излегува, посочуваат изворите.
.webp){kind=icon}
