Дали и какви дивиденди може да се очекуваат од македонските блучипови?

Инвеститорите во акциите на компаниите што се дел од македонскиот берзански индекс МБИ10 деновиве се во исчекување на објавата на финансиски резултати за 2025 година, од кои ќе може да се насети какви би можеле да бидат нивните дивидендните политики. Главните прашања се дали воопшто ќе има исплата на дивиденда и дали може да се очекува зголемување на износот во однос на претходната година. Ако се земат предвид искуствата од изминативе години и остварените резултати на компаниите од МБИ10 во периодот јануари-септември 2025 година, тогаш би требало да се очекуваат позитивни одговори на двете прашања за повеќето компании. 

Како работеа компаниите во минатата година?

Седум од вкупно десет компании што се составен дел на МБИ10 имаа зголемување на добивката во периодот јануари-септември 2025 година споредено со истиот период претходната година. Меѓу нив се истакнува фармацевтската компанија „Реплек“, која во овој период има зголемување на добивката од дури 76,5 проценти.

Забележително е дека помала добивка имаа три банки („Комерцијална банка“, „НЛБ банка“ и „ТТК банка“). Треба да се напомене дека станува збор за незначително намалување и дека постои реална можност конечните резултати за 2025 година да бидат во зелено.

 

Какви беа досегашните дивидендни политики?

Од вкупно десет компании што го сочинуваат индексот МБИ10, пет одлучија да ја зголемат дивидендата за 2024 година во однос на 2023 година. Меѓу нив се истакна „Макпетрол“, каде што имаше зголемување на бруто-дивидендата од 3.700 денари на 4.200 денари. „Комерцијална банка“ ја зголеми бруто-дивидендата од 910 денари на 1.250 денари, „Алкалоид“ од 540 на 630 денари, „Реплек“ од 300 на 400 денари, а „Македонски телеком“ од 25,6 на 27,6 денари по акција. Истовремено, по паузата во 2023 година, „Стопанска банка Скопје“ предложи да се исплати дивиденда во бруто-износ од 229 денари по обична акција за 2024 година.

Од друга страна, намалување на износот на дивидендата имаше кај „НЛБ банка“, „Гранит“ и „ТТК банка“, а „Македонијатурист“ реши да не исплаќа дивиденда за 2024 година.  

Какви беа дивидендните приноси?

„Блумберг Адрија“ веќе пишуваше дека еден од најрелевантните показатели за износот на дивидендата е таканаречениот дивиденден принос што покажува колкав принос ќе оствари имателот на акцијата доколку ја купи по пазарна цена и го оствари правото на дивиденда. Станува збор за едноставна математичка пресметка, која покажува колкав приход ќе се добие во однос на цената на акцијата. Имено, износот на дивидендата по акција се дели со цената на акцијата, а при пресметката се користи последната пазарна цена на крајот на периодот на кој се однесува дивидендата.

Компаниите од Македонската берза што го сочинуваат индексот МБИ10 во изминативе години не можеа да се пофалат со многу високи приноси. За 2024 година убедлив рекордер по овој показател беше „Стопанска банка Скопје“, со принос од 7,7 проценти, а кај повеќето компании приносот беше под пет проценти.

Висината на дивидендата и приносот не треба да бидат пресудни показатели кога се решава дали ќе се инвестира во акции на одредена компанија туку треба да се земат предвид многу повеќе фактори. Сепак, зголемувањето на дивидендата во континуитет дефинитивно треба да се земе како позитивен сигнал, кој на потенцијалните инвеститори им покажува дека компанијата оди во добра насока.