Самит во Скопје: Европа не може да се обедини без Западен Балкан

Првпат во историјата на Европа, доколку правилно работиме, со процесот на проширување можеме да ја обединиме Европа. Европа не може да биде обединета без Западниот Балкан, порача еврокомесарката за проширување, Марта Кос денеска од Скопје, каде што се одржува  самитот ЕУ-Западен Балкан посветен на Планот за раст.  

На самитот што се одржува под мотото „Стабилност, заедништво, иднина“, а чиј домаќин е македонскиот премиер Христијан Мицкоски, покрај еврокомесарката Кос учествуваа српскиот министер за евроинтеграции Немања Старовиќ, претседавачката на Советот на министри на Босна и Херцеговина Борјана Кришто, премиерот на Албанија Еди Рама, на Косово Албин Курти, на Црна Гора Милојко Спајиќ, како и министри, високи претставници од Европската Унија, регионални организации и меѓународни институции.

Фото: Влада

Во своето обраќање пред почетокот на самитот Кос рече дека во ЕУ има јасен консензус за дополнително и итно проширување, сега. „Не беше така во минатото, но имате шанса, што морате да ја искористите, нема да трае секогаш и гледаме значаен прогрес“, рече Кос.

Таа го истакна напредокот на земјите од регионот и додаде дека се разнежува кога зборува за Западен Балкан бидејќи „регионот ми е многу драг“.

„Знам дека клучните реформи, коишто ги бараме од вас не се едноставни. Тие задираат во закоравени структури на интереси, на моќ и на многу начини бараат длабока општествена темелна трансформација и потребно е лидерите да ја водат оваа промена. Ве уверувам дека вреди. Добивките се вредни - стабилност, безбедност и просперитет за сите ваши граѓани“, порача Кос.

Фото: Влада

                    

Договорените реформи со земјите од региoнот се 75 отсто имплементирани Еврокомесарката за проширување Марта Кос денеска во Скопје истакна дека лидерите прв пат се состанале да говорат за импламентацијата, оти се покажани првите резултати, како и дека 75 отсто од договорените реформи за сите земји се или имплементирани или тој процес е во тек. Таа потенцира дека Планот за раст е клучен дел од она што се нарекува забрзана интеграција, каде што Комисијата планира да го интегрира регионот во единствен пазар, како и во европските политики за одбрана, безбедност и подготвеност, пред земјите од него станат членки на ЕУ. „Ако на минатиот Самит говоревме за плановите, сега дојдовме во фаза на имплементација, овој Самит првпат се однесуваше за имплементацијата. Ги покажуваме првите резултати, 75 проценти од договорените реформи за сите земји се или имплементирани или во тек е нивно имплементирање. Една четвртина сепак не е изготвена и затоа ги поканувам лидерите да ја забрзаат оваа имплементација. Ајде сега да зборувам за конкретните резултати, коишто може да се видат. Земете ги на пример овозможување на плаќањето на многу побрз и полесен начин. Едноставно кажано значи дека младите претприемачи, на пример во Скопје или пак во Тирана може да добиват исплати од цела ЕУ, исто како деловните субјекти во Мадрид или во Виена. Ова важи за земјите од Западен Балкан“, рече Кос.

  

Таа додаде дека Планот за раст е „целосно во ваши раце, нема мешање од политичките динамики и тоа целосно ќе помогне замјите од регионот да се подготват за членството во ЕУ“.

Премиерот Христијан Мицкоски на отворањето на самитот порача дека „нашата сила е во обединетоста и стабилноста преку зајакнување на односите со нашите соседи и со Европската Унија, преку отворање нови пазари, нови работни места, нови пријателства, отстранување на бариерите за трговија, подобрување на инфраструктурата и зголемување на инвестициите“.

Осврнувајќи се на тоа дека Македонија е првата земја од Западен Балкан што го заврши договорот за предфинансирање во рамки на Планот за раст, Мицкоски истакна дека тоа е „рефлексија на довербата која ја уживаме во однос на нашата заложба, посветеност, владеењето на правото и економската модернизација, поставувајќи пример за нашите соседи и забрзувајќи го нашиот пат кон ЕУ“. 

„Овој европски пат им припаѓа на сите граѓани, на сите бизниси, на секоја заедница, сите да бидеме дел од оваа трансформација. Кредибилитетот на Планот за раст на ЕУ се заснова на исполнување на ветувањата и испорачување на придобивките, граѓаните треба да ги почувстуваат продобивките од интегрирањето сега во нивните бизниси, во институциите, во секојдневниот живот. Сите имаме заедничка иднина и за да обезбедиме единство и стабилност потребно е да работиме заедно како соседи, како партнери, како регион. Заедно можеме да изградиме силен и поврзан регион, кој е просперитетен, инклузивен и европски“, порача Мицкоски.

Фото: МИА

Тој нагласи дека Западен Балкан е витален дел од европската сегашност и суштински за нејзината иднина. Тоа, како што додаде, е регион со богат со потенцијал и амбиции, што често пати е засенето од наративи на поделби и одложувања.

„Но кога ќе погледнам во просторијава гледам различни приказни, регион дефиниран од дух кој одбива да биде оставен назад. Овој самит е посветен на заедничка визија, визија во која се зголемуваат инвестициите, иновациите цутат, а интеграцијата создава можности, кои се достапни за сите, визија во која Западниот Балкан повеќе не е чекална, туку регион кој се движи, расте и еволуира. Како Влада оваа визија не води во секој чекор што го правиме, во нашите заеднички реформски напори и регионалната соработка“, рече Мицкоски.                      

Можен бесплатен роаминг за Западен Балкан со ЕУ Од први јануари 2026 година, ако има реформи земјите од Западен Балкан ќе имаат можност за бесплатен роаминг со Европската Унија. Ова денеска на прес-конференција го најави еврокомесарката за проширување и добрососедска политика Марта Кос, на лидерскиот самит на Европската Унија и земјите од Западен Балкан посветен на Планот за раст во Скопје. „Денеска зборувавме и за роамингот. Ако навистина работиме трудољубиво, а вие лидерите имате волја да го сторите тоа, ќе има многу реформи кои ќе ги сменат законите и ќе можеме да имаме бесплатен роаминг за земјите од Западен Балкан од 1 јануари 2026. Со тоа, вашите граѓани ќе можат да комуницираат без дополнителни трошоци кога ќе патуваат во земјите од Европската Унија“, кажа еврокомесарката Кос.

 

На заедничката прес-конференција со еврокомесарката за проширување, Марта Кос, Мицкоски рече дека „нашата држава чекори по европскиот пат со отворено срце и разум, со прифаќање на европските вредности, меѓутоа се противи на уцените кои не се дел од тие вредности“.

„Не прифаќаме наметнувања под маска на европскиот процес. Европа е дом на правото, на правдата, на достоинството. Тоа се вредностите што ги прифаќаме – сè друго е туѓо за ЕУ, и туѓо за нас“, порача Мицкоски.

Тој додаде дека „нашите реформи не се декорација. Тие се потреба. И ние нема да чекаме некој да не' турка“.

„Ќе се движиме самите, со сопствената волја, со конкретен план и со јасна визија. Испорачуваме резултати, не затоа што тоа некој го бара од нас, туку затоа што тоа го заслужуваат нашите граѓани. Ќе продолжиме да ги следиме европските вредности не затоа што тоа ни го наложува некој, туку затоа што тоа е нашиот избор, нашиот пат, нашата определба. И затоа, благодарни сме за поддршката од Европската комисија, но уште повеќе сме решени сами да си помогнеме, да ги спроведеме реформите и да ја трансформираме државата, со инвестирање, со работа, со доверба во сопствените сили и со партнерство со ЕУ“, нагласи Мицкоски.

Тој рече дека на денешните разговори се фокусирале на реализацијата на Планот за раст на ЕУ за Западен Балкан. Нагласи дека за нас овој план не е формалност, туку алатка преку која ќе се трансформира државата.

„Ќе ги модернизираме јавните услуги, ќе го унапредиме образованието, ќе инвестираме во енергетска и дигитална инфраструктура. Ќе ја направиме државата вистински европска дома - пред да стане формално дел од ЕУ“, додаде Мицкоски. 

                     

После цела една година труд и работа БиХ ја усвои реформската aгенда  Еврокомесарката за проширување, Марта Кос упати честитки што по цела една година Советот на министри на Босна и Херцеговина ја усвои реформската агенда, која што е услов за да им се придружи на петте земји на Западен Балкан и да почне да ги користи средства од фондовите на ЕУ. Одговарајќи на новинарско прашање, на прес-конференција по самитот во Скопје околу тоа што треба лидерите на Босна и Херцеговина да направат, за да има прогрес во имплентацијата на реформите, Кос одговори дека оваа добра вест се случила во петокот и во текот на наредните денови очекува и официјално известување од Сараево. „Кога Комисијата ќе ги усвои реформите ќе потпишат договори и тогаш ќе започнеме да работиме на ова прашање. Не можам да опишам колку сум среќна, што после цела една година труд и работа на ова прашање Босна и Херцеговина им се придружи на другите пет земји. Можам да им честитам. Сепак Македонија беше прва што ја презентираше реформската агенда, сега сите шест земји од Западен Балкан имаат ваква реформска агенда“, рече Кос. Еврокомесарката за проширување на ЕУ, Кос потенцираше дека тајмингот е многу важен, бидејќи парите, што ги користат земјите од Западен Балкан ќе бидат достапни до крајот на 2027 година. „И ако не ги искористиме, земјите не успеат да ги апсорбираат, јас ќе морам да ги вратам парите во буџетот на ЕУ и мислам дека има подобри решенија од тоа. Доколку вие ги испорачате реформите, ние поскоро би ви ги дале, отколку да ги вратиме во буџетот на ЕУ, ако јас се прашувам за тоа. Сакам и до последно евро да се потроши на земјите на Западен Балкан“, рече Кос.

  

 

Во моментов нема коментари за веста. Биди прв да коментира...

Остави коментар