Иран ја разгледува понудата на САД за рестартирање на нуклеарните преговори

Иранскиот министер за надворешни работи изјави дека САД се обидуваат да ги обноват нуклеарните преговори со Техеран, нагласувајќи дека неговата земја не брза да продолжи со разговорите.

„Американците инсистираат да се вратат на преговарачката маса“, рече Абас Арагчи во телевизиска изјава во саботата, додавајќи дека Иран добил „повеќе пораки“. Техеран ги разгледува своите можности во врска со времето, локацијата и структурата на потенцијалните разговори, но „не брза да влезе во непромислени преговори“.

Арагчи беше главен преговарач во разговорите со САД под посредништво од Оман, кои пропаднаа откако Израел на 13 јуни започна изненадувачки напад врз нуклеарните постројки на Иран. Во нападите загинаа неколку високи воени и нуклеарни функционери и беа погодени густо населени урбани области, како и затворот Евин во Техеран.

Коментарите на Арагчи следат по вечерата на американскиот претседател Доналд Трамп кој во понеделникот ја имаше со израелскиот премиер Бенјамин Нетанјаху, кога рече дека е отворен за укинување на санкциите кон Иран. Неговиот специјален претставник, Стив Виткоф, кој ја предводеше американската делегација во претходните преговори, рече дека се очекува средба со Иран во текот на неделата.

Арагчи, исто така, рече дека на Иран му се потребни гаранции дека нема повторно да биде нападнат ако преговорите бидат неуспешни. „Изразени се некои гаранции дека нема веќе да има војна и ние ги разгледуваме“, рече тој без дополнително да образложи за што точно станува збор. „Доколку се укаже можност да се обезбедат интересите на иранскиот народ, нема да ја пропуштиме. Вратите на дипломатијата никогаш не се затворени.“

САД се придружија на израелскиот напад на 22 јуни, напаѓајќи три ирански нуклеарни објекти. Трамп тврдеше дека ја „уништил“ нуклеарната инфраструктура на Иран, додека иранските власти рекоа дека локациите се „лошо оштетени“, но не се уништени. Како одговор, Иран испали ракети врз катарската воздухопловна база што ја користат американските трупи. Примирјето меѓу Иран и Израел стапи на сила подоцна во јуни и досега се почитува, и покрај тоа што двете страни меѓусебно се обвинуваат за прекршувања.

Арагчи повтори и дека соработката на Иран со Меѓународната агенција за атомска енергија „не е запрена“, иако додаде дека барањата за мониторинг сега ќе се разгледуваат „од случај до случај“ и ќе се обработуваат исклучиво преку Врховниот совет за национална безбедност на Иран.