.webp){kind=icon}
Следната недела во Монтереј, Калифорнија, на најпрестижниот годишен саем за гламурозни автомобили, „РМ Сотби“ (RM Sotheby's) ќе го украси салонот да изгледа како гаража со правливи греди, стари гуми и 'рѓосан лимен покрив.
Поставена во близината на блескавите бели шатори на другите аукциски куќи и среде добро уреденото зеленило на Конкурсот на елеганцијата во Пебл Бич, таквата инсталација вообичаено би се сметала за грда глетка. Сепак, содржината на изложбата го оправдува нејзиното присуство. Тоа е внимателно обмислена идеја, која совршено се вклопува.
Напуштената гаража е соодветна сценографија и реклама за неодамна откриените 20 хаварисани „ферарија“, кои ќе бидат достапни за продажба за време на Неделата на автомобили во Монтереј. Тоа е реплика на просторот каде што автомобилите првично ѝ беа изложени на јавноста во 2004 година, откако ураган ја уништи зградата во која сопственикот Волтер Медлин ги чуваше овие автомобили.
Со вкупна проценета вредност од речиси 20 милиони долари, ова е највисоката сума за колекција на оштетени и расипани „ферарија“ што досега биле на јавна продажба. Тие се и најновата понуда во трендот што долго време ги привлекува колекционерите на автомобили низ светот - привлечноста на пронајдоци во стари гаражи.
Ферари 275 ГТБ6Ц (1965) од Скаљети има наведена цена од 2 до 2,5 милиони долари
RM Sotheby's
„Дел од шармот и страхопочитта кон колекцијата произлегува oд познатата фотографија од автомобилите откако ураганот ја урна гаражата во која беа и ги оштети и нив“, вели Тачер Кист, координатор на аукцијата за „РМ Сотби“. „Почувствувавме дека реконструкцијата на тоа како автомобилите стигнаа до нивната сегашна состојба е исклучително важна“.
Занесната убавина на распаѓањето
Терминот „пронајдок од гаража“ често се користи во секојдневниот говор и се однесува на возило што е откриено во напуштен простор - или гаража или нива - и е оставено напуштено со децении, дозволувајќи му на времето да го земе својот неизбежен данок. Меѓутоа, има повеќе нивоа на овој концепт. Терминот „возило“ може да се однесува на каросерија на автомобил без мотор и без седишта, или на мотор поставен во шасија со неколку останати тркала и резервни делови во ќошот на магацинот. Тоа може да биде целосно пропаднат „астон мартин ДБ4“ (Aston Martin DB4) или добро сочуван „мерцедес-бенц 300 СЛ галвинг“ (Mercedes-Benz 300 SL Gullwing), кој стоел недопрен со генерации, чекајќи ја вистинската личност да го открие неговиот шарм - и да го финансира неговото воскреснување.
„Постои тенка линија помеѓу нешто што е оставено и соодветно негувано и сакано и нешто што е заборавено и целосно запуштено“, вели Стивен Серио, посредник за продажба на автомобили што продаде „пронајдок од гаража“ - „порше 356“ (Porsche 356) од 1953 година на Џери Сајнфелд во 2004 година. „Сум имал претежно одлични искуства со работи што сум ги нашол, а се правилно складирани“.
Автомобилите од големи брендови како „Бугати“, „Ферари“, „Мерцедес-Бенц“ и „Порше“ што се „пронајдоци од гаража“ го претставуваат светиот грал за колекционерите. Тие имаат најголем потенцијал за ниски инвестиции и висока заработка за оние што имаат среќа да ги откријат. Идеално е да му платите на сопственикот - често некој што не ја препознава потенцијалната вредност на автомобилот - прифатлива сума, да го реставрирате возилото и потоа да го продадете со висок профит. Тоа е автомобилски еквивалент на пронаоѓање дело од Пикасо во вашиот плакар или кинеска вазна од династијата Ќинг во продавница за половен мебел.
Ферари 500 мондијал спајдер серија 1 (1954) од „Пининфарина“ има наведена цена од 1,2 до 1,6 милиони долари
RM Sotheby's
Во мај 2021 година, „јагуар ХК150 С“ (Jaguar XK150 S) од 1960 година беше продаден за 127.552 долари на аукција на „Бонгамс“ (Bonhams). Цената на оштетената купе-верзија шесткратно ја надмина процената за продажба. Друг автомобил на истата аукција, „астон мартин ДБ6“ (Aston Martin DB6 Sports Saloon) од 1968 година, двојно ја надмина процената и беше продаден за 217.142 долари.
Разиграност на фантазијата
Иако блескавиот успех на „пронајдоците од гаража“ го изгуби ефектот од врвот на популарноста во средината на 2000-тите, сè уште постои заинтересирана публика. Во таканаречената „сочувана класа“ на изложбите низ светот се прикажуваат автомобили со повеќето или сите нивни оригинални бои и компоненти, дури и ако не се во совршена состојба. Телевизиските емисии како „Hagerty's Barn Find Hunter“ прикажуваат 'рѓосани, но поволни пронајдоци на четири тркала. Во мај колекција од 230 автомобили излезе на аукција откако беа откриени во црква во близината на Ротердам.
Онлајн дилерот на автомобили „Брингатрејлер“ (BringATrailer.com) нема конкретна статистика за продажба токму за такви примери, но има посебна категорија на продажба на проектни возила, од кои голем број се такви. Цените се движат од 3.000 долари за кородиран куп метал од БМВ (BMW) до 70.000 долари... „поршеата“ се во уште полоша состојба.
„Финансиски, секогаш има повеќе смисла да се купи готов автомобил“, вели коосновачот на „Бат“ (BaT), Ренди Ноненберг, кој истакнува дека секој ден добива апликации за продажба во оваа категорија. „Сите сакаат приказна. Многу луѓе се заљубуваат во историјата на возилото. Тие сакаат фотографии пред и потоа и сето тоа. Сè уште има доза романтика во сето тоа“.
„Галвинг проџект 360 СЛ“ (Gullwing Project 300SL), продаден во 2018 година за 1,1 милион долари, минал помалку од 1.000 милји од 1977 година - и е невозен од 1984 година. Минатата година, во една реклама за „јагуар ХК120“ (Jaguar XK120) од 1950 година, беше наведено „оштетена боја, кородирана и избледена“ меѓу атрибутите на автомобилот, заедно со искинат внатрешен покрив, сплескано седиште и разбиен 'рѓосан багажник. Не се возел од крајот на 1960-тите, а се продаваше за 121.900 долари.
„Ако автомобилот е многу нецелосен, примерок од гаража може да биде кошмар“, вели Ноненберг, посочувајќи ги времето, трошоците и логистичките тешкотии поврзани со набавката на делови и работата на постари и непознати автомобили. „Но ако добиете комбинација од убав автомобил од минатото, приказната зад напуштање и потоа приказна за реставрација - кога тие три елементи ќе бидат потврдени - тогаш тоа може да стане една од тие бомбастични зделки“.
Ферари 512 ББ компетиционе (1978) има наведена цена 1,8 до 2,8 милиони долари
RM Sotheby's
„Ферарија“ од Флорида
„Фераријата“ подготвени за Монтереј не се единствените запуштени стари автомобили што се продаваат на претстојниот саем.
„Гудинг“ (Gooding & Co.) продава „бугати тип 57“ (Bugatti Type 57 Ventoux) од 1936 година во оригинална состојба - со сино-сива боја што се лупи од 'рѓа - за 500.000 до 700.000 долари. Педесет години му припаѓал на исто семејство. „Порше 356 А спидстер“ (Porsche 356 A Speedster) од 1957 година, сè уште правлив по пет децении во гаража, на истиот настан се продава од 300.000 до 400.000 долари.
Но „фераријата“ имаат најголем потенцијал да постигнат висока цена. Тие се дел од поголема колекција во сопственост на Медлин, контроверзен жител на Флорида, кој беше особено озлогласен во текот на 1970-тите од различни причини, вклучувајќи даночно затајување, обвиненија за дрога и затворски казни, заедно со неговата наклонетост кон купување егзотични животни. Откако ураган ја урна неговата гаража, привремено правејќи ги возилата видливи за јавноста, автомобилите никогаш повеќе не беа видени.
„Не е тајна дека во таа гаража имаше многу повеќе автомобили - веројатно 40“, изјави Итан Гибсон, портпарол на „РМ Сотби“. „Ние само го избравме најдоброто“.
Меѓу нив е „ферари 500 мондијал спајдер серија 1“ (Ferrari 500 Mondial Spider Series I) од 1954 година од „Пининфарина“ (Pininfarina), со проценета вредност од 1,2 до 1,6 милиони долари. Тркачкиот автомобил заврши на четвртото место во класата (14-ти во генералниот пласман) на „Миле милја“ (Mille Miglia) во 1954 година и по целосната реконструкција од страна на Скаљети, исчезна од лицето на земјата досега. „Ферари 512 бб“ (Ferrari 512 BB Competizione) од 1978 година, со цена од 1,8 до 2,8 милиони долари, е еден од трите примероци со фабрички спецификации опремени за „24 часа Ле ман“ во 1978 година. Има кратка листа сопственици - само двајца.
И „ферари 250 ГТ“ (Ferrari 250 GT Coupe Speciale) од 1956 година од „Пининфарина“ бил продаден сосема нов од фабриката на првичниот сопственик, кралот Мохамед Петти од Мароко, и носи траги од неговата оригинална комбинација на бои: целесте со покрив во неро нијанса. Проценетата цена е од 1,7 до 2,3 милиони долари.
Секое од нив и уште 17 „ферарија“ ќе бидат посебно понудени. Продажбата започнува на 17 август.
