„Ролекс“ (Rolex SA) ќе започне со издавање сертификати за автентичност на овластени продавници што препродаваат половни часовници од овој бренд, потег што ќе ѝ овозможи на швајцарската компанија поголем надзор над своите производи и ќе го размрда пазарот за половни луксузни часовници, вреден 20 милијарди долари.
Швајцарскиот дилер „Букерер“ (Bucherer) ќе биде првиот што во продавниците низ Европа ќе започне со продажба на половни часовници „ролекс“ што ќе бидат сертифицирани како автентични од страна на компанијата, објави „Ролекс“ на својата веб-страница.
Други овластени застапници на „Ролекс“ ќе можат да ѝ се приклучат на програмата од пролетта 2023 година. „Ролекс“ соопшти дека ќе сертифицира само часовници стари најмалку три години, во обид да ги одврати т.н. „флипери“ што продаваат нови часовници по цени повисоки од малопродажните.
Rolex SA
Потегот да сертифицира половни часовници од своето производство е значителна промена за „Ролекс“, чии производи доминираат во продажбата од „втора рака“ кај дилерите и онлајн. Според „Делојт“, се очекува пазарот на половни луксузни часовници да порасне на 35 милијарди долари до 2030 година.
„Ролекс“ претходно немаше никаква улога во потврдата на автентичноста или следењето на своите производи откако ќе се продадеа на неговата дилерска мрежа. Програмата исто така ќе помогне за заштита од фалсификати.
Неовластените дилери што продаваат половни часовници лично и онлајн, како и аукциските куќи, нема да можат да се вклучат во програмата.
Други швајцарски производители на часовници веќе ги сертифицираат половните часовници. Часовниците на „Ролекс“ имаат најголем удел во продадените половни часовници.
„Ролекс“ е најголемиот швајцарски бренд за часовници, кој произведува околу милион часовници годишно, со годишна продажба од околу 8 милијарди швајцарски франци (8,5 милијарди долари) и пазарен удел близу 29 отсто, според процените на „Морган Стенли“.
.webp){kind=icon}
