Со амбиција да го искористи растечкиот економски потенцијал на Јужна Кореја и да ги задоволи љубителите на луксузот на клучниот азиски пазар, „Гучи“ ја организираше првата модна ревија во Сеул.
Брендот, во сопственост на „Керинг СА“, одржа ревија во дворот на палатата Гјонгбокгунг во центарот на Сеул. Вечерниот спектакл беше зачинет со музика од оскаровскиот корејски филм „Паразит“, со традиционалното биење и треперење на светлата што се рефлектираат на камените подови.
Јужна Кореја - најголемиот пазар за луксузна стока по жител во 2022 година - стана магнет за светските брендови. Минатиот месец, најважниот бренд на ЛВМХ, „Луј Витон“, исто така одржа модна ревија во Сеул.
Ова е прва изложба на „Гучи“ во Кореја откако Марко Бизари стана извршен директор во 2015 година. Италијанскиот бренд минатата година оствари околу 9 отсто од продажбата на мало токму во Јужна Кореја, процени Морган Стенли. Глумицата Сирша Ронан и к-поп ѕвездата Хани - членка на групата „Нев џинс“ - беа меѓу ВИП-гостите на ревијата.
За време на дефилето беа прикажани ретрофутуристички парчиња, како металик сребрени бомбер-јакни што потсетуваат на стилот од 1970-тите, кој беше претходник на културата на улична мода, вклучувајќи широки црни вреќести панталони и актовка „гучи“ во која може да се стави и скејтборд. Легендарното лого GG беше истакнато на маиците и чантите.
„Керинг“ се бореше со неволји во последните години, бидејќи популарноста на „Гучи“ значително опадна меѓу потрошувачите, заситени од дизајните на поранешниот креативен директор на „Гучи“, Алесандро Микеле, кој ја напушти куќата во ноември минатата година.
Креациите за ревијата во Сеул беа дизајнирани од дизајнерскиот тим на Гучи, бидејќи неодамна назначениот креативен директор Сабато де Сарно ќе ја претстави својата дебитантска колекција дури во септември, за време на Миланската модна недела. Неговите креации ќе бидат достапни за продажба во почетокот на следната година.
Италијанскиот бренд оствари околу две третини од оперативниот профит на „Керинг“ во 2022 година, но сличната продажба едвај порасна во текот на тој период. Тие исто така пораснаа малку во првиот квартал од оваа година, додека конкурентите, како „Хермес интернешнал“ и ЛВМХ, забележаа двоцифрени стапки на раст.
Преведе Сузана Митревска
.webp){kind=icon}
