Роналдо инвестира во платформа за продажба на луксузни часовници

Кристијано Роналдо купува удел во онлајн платформата за тргување со часовници „Хроно 24“ (Chrono24 GmbH), со што фудбалската ѕвезда добива финансиска изложеност на препознатливиот пазар на луксузни часовници.

Роналдо им се придружува на постоечките акционери на „Хроно 24“, вклучително и приватни фирми и семејниот инвестициски оддел на претседателот на ЛВМХ (Moët Hennessy Louis Vuitton), Бернард Арно. Компанијата не ја откри големината на уделот на португалскиот фудбалер во фирмата со седиште во Карлсруе, Германија, која одржа круг на финансирање во 2021 година, проценувајќи ја на повеќе од милијарда долари.

„За нас беше важно што тоа е значителна сума“, рече во интервју еден од главните извршни директори, Тим Страке.

Пазарот на половни часовници се очекува да се прошири за 75 отсто до крајот на деценијата, достигнувајќи 35 милијарди швајцарски франци (39,6 милијарди долари), според консултантската компанија „Делојт“ (Deloitte). Според „Лаксконсалт“ (LuxeConsult), швајцарска компанија за анализа и консултантски услуги, приходите од претходно поседувани часовници би можеле да ја надминат продажбата на нови часовници до 2033 година.

Добро познат по разновидната лична колекција на луксузни часовници вреднувана во милиони, Роналдо беше забележан како носи брендови од „Ролекс“ (Rolex) до посјајни брендови како „Џејкоб енд ко“ (Jacob & Co.), „Жерар Перего“ (Girard-Perregaux) и „Франк Мулер“ (Franck Muller).

Страке од  „Хроно 24“ рече дека договорот со фудбалската легенда не е компензација или маркетинг договор.

„Тој ни даде пари нам, а не ние нему“, рече Страке.

„Хроно 24“ е најголемиот онлајн пазар за луксузни часовници со дури половина милион часовници од дилери и приватни продавачи поставени на платформата во секое време. Компанијата, за која Страке рече дека има двоцифрени оперативни маржи, заработува надоместоци од секоја трансакција.

По невидениот пораст во 2021 година и првиот квартал од 2022 година, цените на најбараните луксузни часовници од „Ролекс“, „Патек Филип“ (Patek Philippe) и „Одемар Пиге“ (Audemars Piguet) драстично паднаа и се блиску до двегодишен минимум, според податоците од „Сабдајл“ (Subdial), уште една онлајн платформа за тргување во Британија.

„Хроно 24“ намали околу 13 отсто од својата работна сила во јануари и реструктуираше некои од своите операции во услови на пад.

Страке рече дека цените за многу модели на „Ролекс“ се стабилизираат додека најпопуларните часовници од „Патек“ и „Одемар Пиге“, вклучувајќи ги „наутилус“ (Nautilus) и „ројал оук“ (Royal Oak), сè уште паѓаат, иако со многу побавно темпо од минатата година.

Напливот на понудата што ги намали цените минатата година почнува да се намалува, вели тој. Бројот на „патек наутилус“ модели понудени на продажба на платформата се намалил за 20 отсто од јануари, бидејќи побарувачката за часовникот дизајниран од Џералд Џента остана константна.