Ако ги земеме првите 300 менаџери на групацијата „Лореал“ (L'Oréal), просечното работно искуство во компанијата е 18 години.
Николас Хиеронимус е шестиот извршен директор на „Лореал груп“ во 114-годишната историја на компанијата и во неа е речиси четириесет години. Тој ја започна својата кариера како бренд-менаџер за брендот „Гарние“ (Garnier).
Во 1998 година тој ги водеше бизнисите на „Гарние“ и на „Мејбелин“ (Maybelline) во Обединетото Кралство и ги лансира брендовите „Фруктис“ (Fructis) и „Мејбелин“ на пазарот во оваа земја. Тој беше одговорен за создавање на Меѓународниот бренд-менаџмент во рамките на „Лореал Париз“. Хиеронимус исто така ги лансира линијата за нега на кожа „дермоекспертиз“ (Dermo-Expertise) и линијата за мажи „мен експерт“ (Men Expert). Во 2021 година стана и извршен директор. Познат е по тоа што, како што самиот вели за себе, е „зависник од убавина и од производи за убавина“, а во интервјуата често ја нагласува важноста на соработката во индустријата за убавина во целина, но и дека е во контакт со извршните директори на конкурентските брендови, со цел да работат заедно за да креираат решенија за светот. Во интервју за „Блумберг“ минатата година тој објасни дека е-трговијата и социјалните мрежи ја намалија бариерата за влез на стартапи, дека дерматолошката индустрија стана фокус и дека сè повеќе мажи користат производи за убавина. Сега тој предвидува дека пазарот за убавина ќе вреди близу 400 милијарди евра до 2030 година, наспроти сегашните 270 милијарди евра. Според него, растот доаѓа од подемот на средната класа, како и од луѓето што сакаат премиум производи по повисоки цени, но и од проширувањето на базата на потрошувачи не само меѓу жените и младите туку и на сè поголем број машки купувачи.
Николас Хиеронимус, извршен директор на „Лореал“/Дејвид Пол Морис/Блумберг
Исто така, тој минатата година потврди дека продажбата на парфеми сè уште цвета поради постпандемискиот бум, а во согласност со зголемената потреба на клиентите да користат производи за убавина не само како потреба туку и како можност да си угодат.
Сепак, најголемата трансформација што се случува во индустријата за убавина, како што пишувавме и претходно, е она што го нарекуваме „технологија за убавина“ (beauty tech) - употреба на технологија за подобрување на перформансите на производите за убавина, без разлика дали тоа е преку дијагноза или дури и персонализирани производи за убавина направени по мера. „Лореал Париз“ секоја година троши повеќе од 1 милијарда евра на технологија.
Во видеото, Хиеронимус зборува за тоа како најголемата светска козметичка компанија ја користи технологијата во своите производи, со посебен фокус на „Ерлајт про“ (AirLight Pro), кој ќе биде достапен во 2024 година, и како алатките за вештачка интелигенција можат да ја зголемат продажбата. Тој исто така тврди дека користењето на метапрофилите ќе ја зголеми стапката на конверзија на продажните можности од 9 отсто на 73 отсто кога се користи оваа технологија.
.webp){kind=icon}
