Не е злато сè што сјае: Зошто треба да го чувате сребрениот накит?

Не е злато сè што сјае! Така е бидејќи среброто, кога е исполирано, рефлектира дури 95 проценти од видливиот спектар на светлина, што го прави најрефлектирачки метал. Затоа, на пример, многу огледала се покриени со сребро, а во однос на другите предмети и накит, среброто е широко користено. Само запомнете ја изреката: „Роден со сребрена лажица во устата“.

Производството на сребрен накит скокна за 29 отсто минатата година, на 234,1 милиони унци (7.280 тони), што е највисоко ниво од 2010 година. Ова во голема мера е резултат на производството во Индија. Таму силната побарувачка по пандемијата, поттикната од масовното складирање на големите брендови на накит и преминот кон повисока чистота, резултираше со двојно зголемување на обемот во однос на година претходно (за 60 отсто повеќе од нивото пред ковид-19), според Светскиот извештај за среброто (World Silver Report), кој годишно го објавува Силвер институтот (Silver Institut). Надминувајќи го накитот во проценти, побарувачката за сребрен прибор во 2022 година забележа неверојатен раст од 80 отсто.

Среброто и златото се различни метали, но во однос на „стандардот на вредноста“ биле речиси идентични со векови, а некои извори наведуваат дека во времето на Древен Египет биле исти по вредност. Всушност, немало ниту збор што ги разликувал, бидејќи и двете биле познати како „бел метал“, термин што и денес понекогаш се користи за сребро. Дури откако по првпат вредноста на среброто била одвоена од вредноста на златото во 1870-тите, државните влади повеќе не можеле да ги третираат како заменливи. Оттогаш, среброто обично е поевтино од златото, што го прави подостапно за малопродажните инвеститори што сакаат да поседуваат благородни метали како физички имот.

Bloomberg Chartmaker

Среброто има уште една инвестициска предност во однос на поскапиот „братучед“. Тоа наоѓа примена и во разни други индустрии. Половина од среброто се користи во тешката индустрија и високата технологија, вклучувајќи паметни телефони, таблети, електрични системи за автомобили, ќелии од соларни панели и многу други производи и апликации, според Светскиот извештај за среброто.

Под водство на крајните корисници во зелената економија, се предвидува дека индустриската побарувачка повторно ќе порасне, за 4 проценти, достигнувајќи нов рекорд годинава. Двигателите на овој раст, меѓу другото, вклучуваат инвестиции во фотоволтаични панели, електрична енергија и 5Г-мрежи, враќање на растот на побарувачката за потрошувачка електроника и зголемување на производството на возила, според гореспоменатата студија.

 

 

Како да се инвестира?

Инвестирањето во физичко сребро е можеби најтрадиционалниот и најдиректен пристап кон стратегиите за сребрени инвестиции. Ако наидете на терминот сребрена прачка (англ. bullion), тој се однесува на која било форма на физичко сребро што се стекнува за инвестициски цели и вклучува монети, но и прачки. Сребрените прачки доаѓаат во различни големини, а нивната вредност се одредува според тежината и чистотата.

Цената е околу 109 илјади динари за прачка од половина килограм (Србија), 581 евро за половина килограм (Хрватска) и 580 евра за прачка од половина килограм (Словенија).

Wei Leng Tay/Bloomberg Сребрени прачки во магацин во Сингапур

Купувањето специфични сребрени монети ковани од овластени државни ковачници е еден од најраспространетите облици, бидејќи често се пласира на пазарот како подарок за сребрени јубилеи и други прослави. Најдоходовните примери се: виенската филхармонија, канадскиот јаворов лист и Велика Британија.

Најпопуларна во Европа е виенската филхармонија (германски: Wiener Philharmoniker), произведена од Австриската ковачница (Münze Österreich). Монетата, која беше пуштена во оптек во 2008 година, а го доби името по Виенскиот филхармониски оркестар, од кој е инспириран дизајнот на двете нејзини страни. Инаку, над 800-годишната традиција на ковање сребрени монети во Австрија се должи на англискиот владетел Ричард Лавовско Срце, кој бил заробен во Австрија на враќање од крстоносните војни во 1194 година поради претходно изречени навреди кон војводата Леополд Петти. Ричард го платил својот откуп со 15 тони сребро. Леополд решил да кова монети од тоа сребро, со што ја започнал историјата на ковањето во Виена.

Andrey Rudakov/Bloomberg

Виенската филхармонија во моментов е единствената европска монета со номинална вредност во евра. Иако е законско средство за плаќање само во Австрија, чини 35-40 отсто од продажбата во Европа. Моменталната цена на една монета е 38,78 евра и 41,78 евра, доколку ја сакате во кутија како за подарок.

На веб-страницата на ковачницата можете да најдете кои се овластени дистрибутери по земја.

Доколку се одлучите за опции за инвестирање во физичко сребро, експертите советуваат да ги земете предвид и трошоците за изнајмување сефови и осигурување.

Инвестирање во ЕТФ

Ако не сте еден од оние што мораат физички да ги поседуваат своите инвестиции, финансиските советници ги посочуваат берзанските фондови (ЕТФ) како популарен начин за инвеститорите во сребро, без обврска да ги чуваат физичките средства. Можете да купите акции и да ги чувате на традиционална брокерска сметка. Во ова сценарио, операторот на фондот е одговорен за трошоците за чување на физичките резерви на сребро и наплатува надомест за управување со вашиот фонд.

Кога инвеститорите купуваат ЕТФ, тие се потпираат на финансиските институции за да ги исполнат своите обврски. Важно е да се нагласи дека со инвестирање во ЕТФ, вие всушност не го поседувате металот. Исто така, некои ЕТФ-ови поврзани со благородни метали се оданочуваат како колекционерски предмети и немаат корист од пониската даночна стапка на долгорочни капитални добивки, објаснуваат финансиските советници од „Морган Стенли“ (Morgan Stanley).

Некои продавачи во светот им нудат на приватните инвеститори да отворат сметка преку која можат да купуваат, продаваат и исто така да ги чуваат своите инвестиции со ниски трошоци за складирање и осигурување. Прачки се чуваат, на пример, во професионални трезори во Цирих, Лондон, Торонто, Сингапур или во Њујорк.

„Булион волт“ (BullionVault), една од онлајн инвестициските услуги, која надгледува 4,1 милијарди долари на повеќе од 100.000 корисници низ светот, како што е истакнато на нејзината веб-страница, ветува ефикасна продажба во која парите ги добивате веќе следниот ден. Еве како изгледа нивната табела со различни инвестициски опции и наведените предности во споредба со другите форми.

 

 

„Многумина ја пропуштаат сребрената нишка затоа што очекуваат злато“

Друга опција е да се инвестира во компании за ископ на благородни метали. Повторно, има голем број средства - од активно управувани до пасивни фондови со кои се тргува преку  берза - што можете да ги користите за оваа намена (иако нема да добиете чиста инвестиција во сребро, бидејќи тоа е главно нуспроизвод на ископување други метали). „Слично на среброто, компаниите за ископ на благородни метали се нестабилни и нивните историски перформанси се лоши“, известува Џон Степек за „Блумберг“.

Така, на пример, неодамна „Габриел рисорсис“ (Gabriel Resources Ltd.), канадски развоен проект што имаше за цел во Романија да изгради еден од најголемите рудници за злато и сребро во Европа, го загуби барањето за отштета од таа земја поради суспензијата на проектот. Имено, „Габриел“ повеќе од една деценија се обидуваше да изгради рудник во Росија Монтана, во западниот дел на Романија, и беше блиску до добивање зелено светло за проектот во 2013 година. Сепак, додека се наближуваше гласањето за парламентарна поддршка, демонстранти излегоа на улиците на Букурешт поради потенцијалните еколошки последици од проектот, што го натера тогашниот премиер Виктор Понтау да ги повика пратениците да го отфрлат планот.

Меѓународната арбитражна институција на Светската банка ѝ додели на Романија околу 10 милиони долари за правни услуги и трошоци, се наведува во соопштението на оваа компанија. Цената на акциите на компанијата ден пред оваа одлука, на 8 март годинава, изнесуваше 0,87 канадски долари, што е апсолутен рекорд за последните пет години, а потоа веднаш падна на 0,02 канадски долари, колку што е и денес.