Уметничка работилница за хармонија, подмладување и инспирација во близината на археолошкиот локалитет Стоби им се нуди на туристите. Деталите за овој ексклузивен настан, кој треба да се одржи од 20 до 27 јули годинава, се објавени на „Бук ритритс“ (Book Retreats), еден од водечките пребарувачи на одморалишта за личен развој.
„Ослободете го умот, а потоа уживајте во забавните часови по сликарство. Истражете ги прекрасните предели на Демир Капија и античкиот град Стоби. Сите нивоа на искуства со уметност се добредојдени“, пишува на сајтот каде што е објавена и деталната програма.
Пакетот од 1.999 долари вклучува сместување со појадок во хотел во селото Паликура, општина Росоман, кој е во сопственост на позната македонска винарница. Во цената се вклучени и дневните часови по уметност, како и специјализираните работилници, но не и авионските билети и трансферот од аеродром. На гостите, кои треба сами да си ги обезбедат другите оброци во текот на денот, како посебни атракции им се нудат два факултативни излета -дегустација на вино во Тиквешкиот Регион и целодневна тура низ археолошкиот локалитет Стоби.
Кампот го организира „Арт Мира студио“ (Art Mira Studio), уметнички бизнис-концепт што опфаќа интерактивни работилници и програми за возрасни и деца. Овој стартап е основан во 2017 година од Мира Митрова, македонска сликарка што живее и работи во Њу Џерси.
Во описот на нејзината компанија се наведува дека нивна основна мисија е да ги инспирираат луѓето да размислуваат креативно и да им помогнат да го редефинираат сопствениот свет.
„Сакам да изградам систем што успешно ја пренесува слободата во современото потрошувачко општество без употреба на активна технологија. Моите најважни извори на енергија се боите и линиите и целиот спектар на светлина. Боја по боја ги сликам суштината, духот и енергијата на светот што ме опкружува“, навела Митрова во својот официјален каталог.
Мира Митрова е родена во Македонија. Студирала графика и графички дизајн на Факултетот за ликовни уметности при Универзитетот „Св. Кирил и Методиј“ во Скопје. Нејзиниот плакат за 60-годишнината на Република Македонија во 2004 година е награден со Македонската национална награда. Таа е етаблирана уметница, која изложувала дела на различни континенти, вклучувајќи ги Париз, Берлин и Њујорк, пишува во нејзината биографија.
Освен што им помага на луѓето да се пронајдат себеси и, како што вели, да ја исчистат негативната енергија што се создава од секојдневните притисоци, Митрова во САД редовно организира индивидуални и групни часови по уметност.
Според цените наведени на сајтот, месечните школарини во нејзиното студио чинат, во просек, околу 200 долари. Таа држи и приватни часови, кои ги наплаќа по 85 долари за ученици од 6 до 18 години и 95 долари за возрасни.
.webp){kind=icon}
