Ексклузивно со Викторија Бекам: Нетфликс ќе ги прикаже моите модни триумфи, но и моите солзи

За некој што е познат уште од доцните деведесетти, Викторија Бекам е изненадувачки зафатена во дваесеттите години од новиот милениум. По многу години работење со загуби, нејзината истоимена модна компанија Victoria Beckham Holdings Ltd. забележа раст на приходите од над 50 проценти во 2023 година и ги намали оперативните загуби пред оданочување на 2,9 милиони фунти, со што стабилно тргна по патот кон профитабилноста – што не е мала работа за независен луксузен моден бренд. Госпоѓа Бекам исто така пред две години претстави успешна линија парфеми и стана случајна ѕвезда во документарната серија на Netflix за нејзиниот сопруг, фудбалската ѕвезда Дејвид Бекам. Нејзините шармантни и духовити појавувања во серијата ја прикажаа разиграната и пристапна страна на овој моќен пар, познат по усогласените виолетови Versace венчаница и костум.

Оваа година не изгледа ништо помалку возбудлива за Викторија Бекам. Првпат ја претстави својата „resort“ колекција во живо, наместо дигитално, на гламурозен настан на 55-тиот кат од познатата кула Вандербилт, во ресторанот „Centurion New York“, каде што членовите на Centurion клубот, сопственици на платинести American Express картички, први можеа да изберат парчиња од понудата. На есен, Бекам ќе биде ѕвезда во своја документарна серија на Netflix, која ќе го следи нејзиниот секојдневен живот како креативна директорка на нејзините модни и козметички брендови.

Поранешната фудбалска ѕвезда, сопругот Дејвид Бекам, е исто така еден од инвеститорите во модниот бренд Викторија Бекам Фото: Depositphotos

„Со напорна работа и решителност, брендот стана тоа што е денес и затоа сум многу горда што можам како независен бренд да кажам дека работам профитабилно“, изјави Бекам за Bloomberg во ексклузивно интервју во Centurion NY.

Извештаите на нејзината компанија сè уште не можат да покажат дали била во плус во 2024 година. Официјалните бројки за минатата година сè уште не се финализирани, па компанијата не можеше да потврди дали ќе има добивка по одбивање на камати, даноци, амортизација и депрецијација. Во последните неколку години, организацијата доби повеќемилионски финансиски инјекции од своите сопственици: нејзиниот сопруг, потоа XIX Management на Сајмон Фулер и приватната инвестициска фирма NEO Investment Partners. Но стратегијата изгледа дека функционира, бидејќи приходите растат двоцифрено три години по ред.

– Што ве наведе да ја претставите оваа колекција токму во Њујорк?

На деловен појадок со американскиот моден дизајнер Том Браун и легендарната Ана Винтур пред неколку месеци, таа ми рече: „Треба да се вратиш во Њујорк и да претставиш некоја од своите колекции“. Тоа беше нешто за што размислував некое време, бидејќи мојата прва колекција ја прикажав токму тука во Њујорк во 2008 година. Њујорк е огромен дел од моето модно патување. American Express ме покани да дојдам овде и совршено се совпадна да го направам тоа.

Ана Винтур е долгогодишна главна уредничка на списанието Vogue, која ги обликува глобалните модни трендови и индустријата од 1988 година. Фото: Depositphotos

– Дали бевте нервозни кога ја имавте првата презентација во 2008 година?

Бев многу нервозна. И да ви кажам, исто сум нервозна и сега. Затоа што навистина ми е грижа. Знаете, јас сум личност која го сака производот, сакам да создадам облека, шминка и парфеми. Многу сум вклучена во креативниот процес. Никогаш не сакам да се задоволам со просек. Без разлика што креирам, дури и ако е само обична бела маица, мора да има вистински материјал, вистински крој, совршена изработка. Затоа што моето име е на етикетата.

– Според последните јавно достапни бројки од 2023 година, вашите деловни загуби драстично се намалија. Што придонесе за тоа?

Ги намаливме цените и ги споивме двата бренда што ги имавме тогаш во еден. Сакав да си поставам предизвик себеси и на мојот тим – да создадеме колекции кои не изгледаат како компромис. Делуваа промислено, совршено изработени, со навистина квалитетни материјали. Но, како да се направи тоа по пристапна луксузна цена? И не беше лесно.

– Дали ќе мора да ги зголемите цените во САД поради најавените царини?

Во моментов само внимателно ја следиме ситуацијата.

– Вашата облека е многу функционална, секое парче изгледа како да има јасно определена цел.

Верувам дека сè што правам мора да има основа во некоја реалност. Треба да можете сето тоа да го носите. Секогаш ми е смешно кога луѓето доаѓаат на настани и мораат да стојат затоа што не можат да седат. Или не можат нормално да одат. Треба да ѝ дадете слобода на фантазијата, но сепак мора да ја носите таа облека.

– Снимивте документарен филм кој наскоро излегува, кажете ни нешто за него.

Мојот сопруг ме убеди да го направам овој документарец. Искрено, не бев сигурна дека некој навистина ќе сака да види што правам секој ден. Се фокусира на тоа што јас правам и мојата улога како основач и креативен директор на двата бренда. Долго размислував за тоа и сфатив дека сега е вистинското време да го направам.

Бев многу дефинирана од четиригодишниот период во мојот живот кога бев дел од музичката група „Spice Girls“ и многу сум горда на тоа. Но, со тоа дојдоа и сите предрасуди. Во модната индустрија сум речиси 20 години, создавам свои колекции. И требаше толку време да се чувствувам доволно сигурна во тоа што го правам и во мојот бренд за сега да можам да зборувам за своето минато. Можам да зборувам за својот пат, можам да зборувам за борбите, затоа што сега можам да го направам тоа со самодоверба, знаејќи дека тоа нема да му наштети на брендот. Ништо не е разубавено.

– Има ли солзи во вашиот документарец?

Има солзи. И неодамна ми падна на ум – што ќе помислам кога ќе ги видам тие солзи на голем екран? Или на ајфом? Да бидам сосема искрена, сега сум во рацете на монтажерите.

Викторија Бекам од времето кога беше дел од Spice Girls Фото: Depositphotos

 

– Дали вашиот сопруг се појавува во документарецот?

Па, можеби ќе биде исечен од финалната верзија. Мислам, кој знае? Снимија малку и со Дејвид и со нашите деца, затоа што тие се огромен дел од сè.

– Во нашата редакција го обожаваме вашиот стил. Што собирате овие денови?

Собирам часовници, така што имам убава колекција на Patek Philippe. И двајцата сакаме да собираме слики од современи уметници. Тоа е нешто во што навистина уживаме да учиме последниве неколку години. Палетата на бои на оваа колекција беше инспирирана од слики на интригантниот ирски сликар Франсис Бејкон од 1979 година, кои ги имав во мојата продавница, бидејќи неодамна откупив некои од неговите дела во соработка со аукциската куќа Sotheby’s. Тоа се пригушени тонови со изразени акценти на боја. И има принт со црвен цвет инспириран од сликите на англискиот сликар од средната генерација Гери Хјум, кои ги имаме дома. Тоа беа првите уметнички дела што ги поседувавме.

 

– Автомобилот што вашето семејство го имаше додека ги одгледувавте децата стана предмет на мемиња по документарецот за Дејвид. Дали денес возите?

Возам.

– Кој автомобил го возите?

Имам Ферари.

– Кој модел?

О, Боже! Ве молам, не кажувајте дека не знам кој модел е. Морам да го прашам мојот фризер Кен Пејвс да му прати порака на Дејвид и да го праша.

– Кога станува збор за мода, како откривате нови нешта? Дали сте премногу позната за да одите по продавници?

Не. Апсолутно обожавам да одам по продавници, и тоа прилично често. Одам во облека за вежбање, можеби со капче. Сакам физички да ги доживеам брендовите, наместо преку интернет.

– Дали нешто од тоа го пренесувате во вашата продавница во Лондон?

Да. Особено кога станува збор за корисничката услуга.

– Што научивте за културата на услуга кон купувачите?

Колку се важни чуварите што работат на влезот во продавниците.

Познатиот пар доби и свој восочен еквивалент во Мадам Тисо во Лондон, како и во Дубаи и Њујорк Фото:  Depositphotos

 

– Поради кражби?

Поради начинот на кој се чувствуваат луѓето кога влегуваат во продавница. Тоа е дел од ДНК на мојот бренд – да ги пречекаш луѓето. Пред некој ден му реков на мојот обезбедувач кога влегував во продавницата: „Ти си најважната личност тука“. Се сеќавам кога бев помлада и кога ќе влезев во продавници, тоа можеше да биде многу застрашувачко. И никогаш не би сакала некој да се чувствува така. Дури и ако само доаѓате да се инспирирате од архитектурата или да ги погледнете соработките што можеби ги изложувам. Или современата уметност.

– Замислувате ли во иднина да ја продадете компанијата на некоја луксузна групација?

Отворена сум во моментов. Многу сум горда на тоа колку далеку стигнавме како независен бренд. Мислам дека следниот чекор за мене е глобална малопродажба.

– Значи ли тоа дека можеби наскоро ќе добиеме ваша продавница во САД?

Би сакала. Мислам дека тоа, се надевам, ќе се случи во некој момент следната година.

– Одлично, Викторија, ви благодарам многу за одвоеното време.

Ви благодарам вам. Навистина го ценам тоа. И ќе ви јавам кој автомобил го возам.

Нејзиниот фризер Кен Пејвс ни го даде одговорот – Викторија Бекам вози Ферари Рома. Инаку, навистина е одличен возач, само не ја знае марката на автомобилот.