Може ли да се пие кафе за едно евро во Париз?

И покрај тоа што инфлацијата во Франција во јули забави повеќе од очекуваното, во Париз сѐ уште е речиси невозможно да се испие шолја еспресо за помалку од две евра. За среќа, на интерактивната мапа на градскиот совет се прикажани неколку кафулиња во градот во кои може да се испие кафе за едно евро.

Париз, познат по својата убавина, култура и богата историја, често е на врвот на листата на најскапи градови во светот. Во последните години цените на храната и пијалаците во овој француски град значително се зголемија. Меѓу намирниците што доживеаја ненадеен скок на цената се издвојува кафето. Сепак, иницијативата на градскиот совет сака да им помогне на жителите и на туристите да уживаат во омилениот пијалак по прифатлива цена.

Кафето, неизоставен дел од утринската рутина на многу луѓе, е најпопуларниот пијалак во шармантните париски кафулиња. За жал, цената на кафето во тие кафулиња е значително зголемена. Онаму каде што пред неколку години кафето чинеше едно евро, денес можеме да очекуваме цена од две евра. Во најпознатите кафулиња во градот цената е значително повисока. На пример, во „Кафе де флор“ (Café de Flore) едно еспресо чини 4,9 евра, а во „Ле ду маго“ (Les Deux Magots) е 5 евра.

Жителите и посетителите на Париз се соочуваат со предизвикот како да уживаат во кафето без да потрошат премногу пари. Градскиот совет на Париз излезе со решение за тој проблем: сите љубители на кафе можат да користат интерактивна мапа за да го најдат најблиското кафуле што сѐ уште нуди кафе по цена од едно евро.

Ситуацијата е значително различна во споредба со последната деценија. Како што пишува на официјалната веб-страница на советот, на интерактивната мапа, која беше пуштена во употреба пред само 10 години, се прикажувале речиси 200 кафулиња што нуделе кафе по цена од едно евро. Денес таа бројка е повеќе од преполовена, односно означени се само околу 80 кафулиња што сѐ уште имаат прифатлива понуда.

Кафето во Париз во просек чини две евра/Depositphotos

Како што можеше да се очекува, кафе за едно евро е тешко да се најде околу Ајфеловата кула и Шанзелизе, додека на север и североисток од градот приказната е сосема поинаква, бидејќи таму главно нема туристи. Само 19 кафулиња јужно од реката Сена нудат кафе за едно евро, додека северно од Сена има трипати повеќе.

„Ние сме едно од локалните кафулиња во соседството и имаме многу редовни муштерии. Фактот што едно кафе кај нас чини само едно евро значи дека нашиот бар е секогаш полн со муштерии, кои доаѓаат пред работа“, изјави за „Франс 24“ Емили Џоли Николас, 27-годишна менаџерка на кафулето.

Да потсетиме, потрошувачките цени во Франција пораснаа за пет отсто во однос на јули минатата година, кога беа најниски од инвазијата на Украина, која ја предизвика енергетската криза во Европа. Со зголемувањето на цените на храната, француските потрошувачи ги намалија трошоците. Сепак, новите податоци покажуваат дека потрошувачката на Французите почнала да се зголемува кон крајот на кварталот, со зголемување од 0,9 отсто во јуни, откако купувањето храна делумно закрепна.

За да се појават локалите на интерактивната мапа, потребно е нивното име и адреса да се внесат на официјалната веб-страница на градскиот совет. Тој ги поканува посетителите да ги споделат и на социјалните мрежи сите бистроа, кафулиња и ресторани во кои нашле кафе за едно евро за да знаат и другите каде да пијат кафе по пристапна цена во еден од најскапите градови во светот.