Лас Вегас ќе биде центар на гастрономскиот универзум, три дена во ноември. Ален Дукасе, Марио Карбоне, Жан-Жорж Вонгерихтен, Масахару Моримото, Хозе Андрес, Кристина Тоси, Рајнер Бекер, Брајан и Мајкл Волтаџо, Дејвид Чанг и Мајкл Мина ќе создадат уникатни менија со потпишани јадења за новиот „Белаџо фонтен клаб“ (Bellagio Fountain Club) за време на големата награда на Формула 1 во Лас Вегас, која се одржува од 16 до 18 ноември. Клубот, лоциран покрај главниот дел од патеката Ф1 долга 60 километри, ќе обезбеди врвен поглед за време на трката и ќе им биде домаќин на првите тројца возачи по трката за интервјуа и прослави.
Билетите, кои ги вклучуваат сите услуги за време на трката, чинат 11.247 долари по лице. Привремените клупски пакети вклучуваат билети за тридневниот настан, храна, пијалаци и забава во клубот, како и ексклузивен пристап до резервации за сместување во портфолиото на соби и апартмани на ресортот МГМ (MGM Resorts), кој е на само неколку чекори.
Привремениот клуб, кој функционира во последните три месеци, се наоѓа пред познатите фонтани прославени во филмот „Оушнс 11“ (Ocean's 11) и нуди поглед на фонтаната и на трката. Со вкупна површина од речиси 173.000 квадратни метри, што е приближно колку три фудбалски игралишта, тој ќе прими 3.600 посетители, вклучувајќи ги и оние на трибините веднаш до него и бината изградена по должината на Лас Вегас стрип. По трката, тројцата најдобри возачи ќе се упатат на победничката бина во „Фонтен клаб“ (Fountain Club) на интервјуа, па навивачите во клубот ќе можат лично да ги видат.
Bridget Bennett/Bloomberg Pursuits
„Вегас секогаш има многу енергија, но Формула 1 е уште посовршена за Вегас бидејќи е ноќна трка, па ќе биде забавна“, вели Вонгерихтен. Големата награда на Ф1 во Лас Вегас во 2023 година започнува во 22 часот по локално време. „Многу е возбудливо да се види како секој го креира своето мени и запознава пријатели од целиот свет“, додава тој. „Обожавам вакви настани“.
Гостопримство во изобилство
Некои локални жители се пожалија на затворањето на улиците за време на изградбата на патеката, што го отежна сообраќајот, а ги ограничи и погледот и пристапот по должината на таканаречениот Стрип. Патеката минува низ центарот на градот и има долг дел каде што возачите можат да достигнат брзина поголема од 340 километри на час.
Дел од патот директно пред „Фонтен клаб“ остана отворен за време на изградбата, со повремено блокирани ленти, потврдија од „Белаџо“. Извршните директори на ресортот „МГМ интернешнл“ (MGM Resorts International), сопственици на „Белаџо“, сметаат дека привремениот клуб и сите тешкотии поврзани со него се дополнителен адут во туристичката понуда на градот, кој брзо станува светска спортска и обложувачка престолнина.
Професионалниот хокеарски тим на Вегас голден најтс (Golden Knights) дебитира таму во 2017 година. Три години подоцна, тимот на Рајдерс НФЛ се пресели од Оукленд, Калифорнија, а веќе во 2028 година ќе им се придружи и бејзбол-тимот Оукленд атлетика. Хотелот „Вин Лас Вегас“ (Wynn Las Vegas) ќе биде домаќин на луксузен автомобилски саем во викендот пред трката. А во февруари стадионот „Елиџент“ (Allegiant Stadium) во Парадајс, Невада, ќе биде домаќин на Супербоул (Super Bowl LVIII), првиот класичен фудбалски настан одржан во Невада. Парадајс се наоѓа веднаш до Лас Вегас и неговите граници вклучуваат поголем дел од Стрип.
Bridget Bennett/Bloomberg Pursuits
„Лас Вегас продолжува цврсто да ја воспоставува својата позиција како спортска дестинација“, рече Ендрју Ланзино, потпретседател за градски манифестации во ресортот МГМ и еден од водечките луѓе што работат на развојот на „Белаџо фонтен клаб“. „Помеѓу фудбалот, хокејот и кошарката, ние стануваме неверојатна дестинација за љубителите на спортот во светот, а Ф1 совршено се вклопува во тоа.
Лас Вегас е добро приспособен за вакви настани. Угостителската и малопродажната инфраструктура веќе опслужува стотици илјади луѓе секој ден. Многу други терени на Ф1 се наоѓаат надвор од градовите домаќини. Патеката на Америка (Circuit of the Americas), која се користи за големата награда на Остин, на пример, е 32 километри од центарот на главниот град на Тексас; патеката за големата награда на Мајами се наоѓа во Мајами Гарденс, Флорида, 24 километри надвор од Мајами; патеката Силверстоун, домаќин на британскиот ГП, се наоѓа во руралниот дел на Англија.
За тимот што го разви клубот „Белаџо“, ова гран при ќе биде само уште еден викенд во Вегас.
„Во некои градови или трки, ова е нешто што треба да го планираат логистички, но градот Лас Вегас, од инфраструктурна гледна точка, го прави тоа секој викенд“, вели Ланзино. Градот продава околу 12 милиони билети за претстави годишно. „Сакаме само да се увериме дека искуството е одлично за сите нас. Сакам ова да стане постојана ставка во распоредот на Ф1, како Монако - при што луѓето ќе го планираат својот календар секоја година за да дојдат во Вегас за Формула 1.
Bridget Bennett/Bloomberg Pursuits
Што има на менито
Готвачите ќе бидат на самото место во клубот, ротирајќи трите дена во текот на големата награда и секојдневно ќе воведуваат нови менија. Вонгерихтен, кој е сопственик на ресторани во Мајами Бич, Лас Вегас, Лондон, Париз, Шангај, Токио, Њујорк и во Сао Паоло, ќе служи варијации на својата француско-тајландска кујна, како што се тост со јајца и кавијар, првокласно говедско месо и чоколадна торта.
„Ќе има многу храна, пијалаци и мирис на бензин, сето тоа измешано“, вели Фонгерихтен, Французин што служел слични оброци на големата награда на Сингапур. Првата Ф1-трка ја гледал како дете во Монако. „Јас сум голем љубител на спортот“. Мина, чија „Мина груп“ (Mina group) вклучува неколку ресторани низ земјата, вклучувајќи ги и „Бурбон стек“ (Bourbon Steak) во Лос Анџелес и „Сорел “(Sorelle) во Чарлстон, Јужна Каролина, ќе служи декадентно парфе обложено со палачинки од компир, јајца, чаден лосос, павлака и кавијар одозгора. Тој ќе служи и верзија на пита со јастог, омиленото јадење на следбениците на Мина откако тој почна да го развива својот бизнис во Сан Франциско пред повеќе од две децении.
„Тоа е пита со коњак, наполнета со беби-зеленчук, печурки и, се разбира, многу јастог, покриен со кора од тесто“, изјави Мина. „Ќе има уште неколку изненадувања на менито што го планираме. Едвај чекам луѓето да го пробаат“.
Чанг, основачот на синџирот ресторани „Момофуку“ и, како што вели, обожавател на Луис Хамилтон, ќе понуди храна каква што би очекувале на спортски настан - хамбургери, пржено пилешко, кифли од туна - но на свој начин, како што рече тој во одговорот на мејл. Бургерот ќе има паштета (foie gras), похованото пилешко доаѓа со кавијар, а туната ќе биде освежително свежа. За погодност, сите јадења може да се јадат со раце.
„Едноставноста е клучот“, рече тој. „Се обидуваме да направиме нешто вкусно и брзо за луѓето да можат да уживаат во трката“.
.webp){kind=icon}
Во моментов нема коментари за веста. Биди прв да коментира...