Вискито отсекогаш било симбол за престиж и префинет вкус, „вода за виталност“ на познатитe, омилен алкохол на хедонистите. Овој жесток пијалак, еден од најбараните во светот, конечно ќе добие и македонска етикета.
Првото македонско виски станува реалност, а ограничени количества „сингл малт“ (Single malt) и бурбон (Bourbon) ќе бидат достапни до крајот на годината.
„Станува збор за дестилиран алкохолен пијалак направен од ферментирана зрнеста каша или со дестилирање пиво, па идејата за првото македонско виски датира уште од 2009 година, кога почнавме да произведуваме пиво“, вели бизнисменот Пане Темов, креаторот на оваа бизнис-приказна.
Дизајн потпишан од локални уметници
Темов првично имал идеја да изгради дестилерија во Дојран, на самата граница со Грција, каде што поседувал земјиште. Сепак, по ковид-пандемијата се откажал од таа инвестиција тешка 150 илјади евра и одлучил првото македонско виски да биде тимски проект.
Името на брендот е деловна тајна. Вели дека во завршна фаза се преговорите со позната скопска дестилерија, која веќе произведува жестоки алкохолни пијалаци, па од истите причини не сака да зборува ниту за конкретни цени, но открива дека ќе бидат значајно повисоки од оние на комерцијалните брендови достапни во регионот Адрија.
Првото македонско виски ќе се полни во шишиња со етикети специјално дизајнирани од етаблирани локални уметници. На пазарот ќе дебитираат со „сингл малт“ (Single malt), виски што се прави само во една дестилерија комплетно од слад. Станува збор за ‘ртена житарка, најчесто од јачмен, која освен за производство на виски, се користи и за правење пиво и други алкохолни пијалаци.
Темов и неговите бизнис-партнери планираат да понудат ограничени количества и бурбон (Bourbon), тип американско виски првенствено направено од пченка.
Depositphotos
„Вискито мора да одлежи најмалку три години. Обично се чува во дрвени буриња, генерално изработени од јагленисан бел даб. Ние на почетокот ќе продаваме младо и доста лесно виски, со изразена житна нота, без бои, шеќери и адитиви, дестилирано и стареено во Македонија“, појаснува тој.
Нема добро виски без... пиво!
Пане Темов се прослави како куклар и уличен забавувач пред да му се посвети на пивскиот бизнис. Тој е основач на првата македонска крафт-пиварница. Во неговата фабрика „Темов“ во моментов се произведуваат пет различни производи од линијата „Хаус оф хопс“ (House of Hops).
Станува збор за природни, ладно ферментирани и нефилтрирани пива, кои се достапни во одбрани скопски барови. Се дистрибуираат во буриња од 30 литри, по цена од 50 до 65 евра, а во малопродажба една чаша чини околу две евра.
Најпродавани се златно-жолтиот „донки пилснер“ (Donkey Pilsner), типичен баварски пилснер со изразено ароматичен хмељ, и црвениот „донки ИПА“ (Donkey I.P.A.) со овошен мирис. Странските туристи, пак, најмногу се интересираат за „џинџер ејл“ (Ginger Ale), пиво со изразен вкус на ѓумбир во комбинација со смрека, кој, според Темов, е баш автентично македонски.
„Вискито е дестилат на сладот, на јачменот од кој се прави пиво. Начинот на производство до одредена фаза е ист, па секаде каде што се произведува пиво може да се направи и добро виски“, завршува Темов.
.webp){kind=icon}
