.webp){kind=icon}
Продажбата на грамафонски плочи во САД се зголемила за само 1 отсто во првата половина на 2022 година, што укажува на заладување по години драматичен раст и скок за време на пандемијата.
Околу 19,4 милиони винилни плочи биле продадени во првите шест месеци годинава, во споредба со 19,2 милиони во истиот период лани, според Luminate Data. Тоа следи по повеќе од 51 отстотен раст на годишната продажба во 2021 година.
Обновената популарност на музичките плочи ги натера продавачите на големо како „Таргет“ (Target Corp.) и „Волмарт“ (Walmart Inc.) да го удвојат својот удел во продажбата на винилни албуми, според Luminate. Други продавници, како што е Amoeba Music, ги преработија своите планови за да се фокусираат на винил.
Побарувачката за постари, т.н. „каталошки“ музички албуми на винил опадна, додека актуелната музика стара помалку од 18 месеци останува растечки пазар за љубителите на винил.
Најпопуларниот винил албум во првата половина на 2022 година е „Harry’s House“, од британскиот кантавтор, Хари Стајлс. Албумот го собори рекордот од модерната ера за најмногу продадени винил албуми во една недела, според Luminate.
