Александар Матановиќ: Зошто „ламборгини“ е мерило за успех во криптокруговите

„Во биткоин-круговите успехот се смета по тоа дали сте заработиле доволно за да можете да купите 'ламборгини'“, вели Александар Матановиќ, експерт за дигитални валути и директор на криптоберзата ЕЦД (ECD) од Белград. Во третата епизода од поткастот „Инспирација“ на „Блумберг Адрија“, со него разговараме за тоа какви промени предизвикаа криптовалутите во светот од нивната појава и колку придонесе тоа за промена на парадигмите во традиционалниот свет на финансиите.

Како една од главните разлики кај дигиталните валути, нашиот соговорник наведува дека тие не се контролирани од банки, институции или држави, што, според него, претставува пат кон едно поинакво, послободно општество, што, како што вели, било неговиот главен мотив пред 15 години да се заинтересира за криптовалути.

Кога првпат била лансирана образовна програма во областа на дигиталните валути, тој бил меѓу првите 15 учесници што завршиле магистерски студии. Тој ја нагласува важноста на образованието и финансиската писменост, која се наметнува како сè поважна потреба на општеството во целина, со цел да се избегнат злоупотребите и да се управува со сопствените финансии на информиран и мудар начин и да се промени негативниот наратив дека поради различни злоупотреби во криптосферата во минатото, сè уште постои. Како важен чекор кон промена на перцепцијата за дигиталните валути, Матановиќ ја наведува неодамнешната одлука на американските регулатори да одобрат биткоин ЕТФ фондови по една деценија, што претставува пресвртница за индустријата.

Матановиќ особено ги нагласува предностите на концептот на лимитираност во бројот на копии на нешто (digital scarcity), што е реткост во дигиталниот свет, каде што сè се дуплира и се копира со голема брзина. Тој смета дека ваквиот концепт започнал револуција надвор од светот на дигиталните пари. На пример, како што објаснува Матановиќ, блокчејн-технологијата зад биткоинот може ефикасно да се примени во областа на регулација на катастарот на недвижности, каде што обезбедува поголем степен на сигурност врз сопственоста. Потоа, тука е можноста за атрактивни маркетиншки активации на луксузни брендови, а наоѓа сè поголема примена и во областа на утврдување на автентичноста на луксузните предмети, особено уметничките дела и дијамантите.

Дознајте повеќе за тоа како безбедно и информирано да инвестирате во криптовалути, да ги избегнувате стапиците на потенцијалните манипулатори и да го осигурите вашиот имот и како стојат работите во овој поглед во земјите од регионот Адрија.

Поткастот „Инспирација“ на „Блумберг Адрија“ се занимава со инспиративни идеи, согледувања и објаснувања што секој може да ги искористи за да направи квалитетен и информиран избор во светот на луксузот, деловната етика, стратегиите за успех и градењето подобро општество во целина. Останете со нас!