По разорните пожари во Лос Анџелес кои го погодија срцето на филмската индустрија, многу познати филмски работници останаа без куќи, вклучувајќи ги Ентони Хопкинс, Мел Гибсон, Џенифер Лав Хјуит, Били Кристал и Гвинет Палтроу. Долго се шпекулираше дали оваа година ќе се одржи доделувањето на најпрестижните филмски награди.
Авторот Стивен Кинг повикува на откажување, како и други познати личности. Но, според сè, таа сепак ќе се одржи на 2 март.
Овој пат, Холивуд страстно застана зад нарко-мјузиклот на „Нетфликс“, „Емилија Перез“. Францускиот филм на Жак Одиар на шпански јазик доминира со дури 13 номинации, вклучувајќи најдобар филм, најдобар режисер и најдобра актерка за Карла Софија Гаскон, со што стана првата отворено трансродова актерка номинирана за Оскар.
Филмот исто така доби номинации за оригинално сценарио, две песни, како и за улогата на Зои Салдана.
Содржината на филмот накратко се сведува на необична задача на мексиканска правничка да му помогне на познат шеф на картел да се повлече од бизнисот и да премине во нов живот како жена, исполнувајќи ја долгогодишната желба. Филмот, дури и во доминацијата на доделувањето на Златниот глобус, беше оценет како автентичен, полн со емоции и со важна социјална порака.
„Светлината секогаш ја победува темнината“, изјави Карла Софија Гаскон при доделувањето на Златниот глобус.
„Можеби можете да нè ставите во затвор. Можеби можете да нè малтретирате. Но, никогаш не можете да ни ја одземете душата, постоењето или идентитетот. Јас сум тоа што сум. А не тоа што вие сакате.“
Остварувањето се истакнува и затоа што е мешавина од повеќе жанрови - мјузикл, комедија, драма и акција.
Иако „Нетфликс“ има истакната улога во Холивуд, сè уште нема освоено награда за најдобар филм. Неговите водечки кандидати, како „Менк“ (Mank), „Ирецот“ (The Irishman) и „Рома“ (Roma) претходно освојуваа голем број номинации, но се враќаа дома со само неколку награди.
„Емилија Перез“ можеби е најдобрата шанса на „Нетфликс“ досега. Меѓу другото, има најмногу номинации за филм надвор од англиското говорно подрачје, надминувајќи го филмот „Рома“ кој имаше 10 номинации.
Покрај тоа, само три филма во историјата на Оскарите - „Сè за Ева“, „Титаник“ и „Ла Ла Ленд“ - постигнале повеќе номинации.
„Емилија Перез“ претходно освои Златен глобус за најдобар филм во категоријата мјузикл или комедија. „Нетфликс“ ги откупи правата за дистрибуција на филмот за Северна Америка и Велика Британија. Надвор од тие територии, филмот дебитираше во кината и оствари заработка од 10,7 милиони долари.
„Бруталист“ (The Brutalist) и „Злобница“ (Wicked) освоија втор најголем број номинации со по 10.
„Злобница“, хит адаптација од Бродвеј, беше номиниран меѓу другото за најдобар филм и глума за неговите ѕвезди, Синтија Ериво и Аријана Гранде.
Филмот „Бруталист“ исто така блескаше на доделувањето на Златниот глобус, кој се смета за најава на Оскарите, Адријан Броди ја освои наградата за најдобар актер, а Брејди Корбет за режисер, откако освои Сребрен лав на премиерата на Филмскиот фестивал во Венеција во септември минатата година. Филмот од својата премиера во американските кина во декември оствари заработка од 5,9 милиони долари. Кога станува збор за Оскарите, во трка е и за главен актер, режисер, најдобар филм, најдобро сценарио, споредни улоги и така натаму.
Трилерот за папата „Конклава“ (Conclave) во режија на Едвард Бергер освои осум номинации, вклучувајќи ја и онаа за најдобар филм. Остварувањето со Ралф Фајнс во улога на кардинал кој го води процесот на избор на нов папа освои Златен глобус за најдобро сценарио. Инаку, во 2023 година режисерот Бергер освои три Оскари за филмот „На Запад ништо ново“ (All Quiet on the Western Front), вклучувајќи награди за најдобар меѓународен филм, сценографија и музика. „Конклава“ оствари заработка од 77,6 милиони долари во кината од својата премиера во октомври 2024 година.
„Комплетно непознато“ (A Complete Unknown), биографски филм за животот на Боб Дилан од продукцијата „Срчлајт пикчрс“ (Searchlight Pictures) на компанијата „Волт Дизни“ (Walt Disney Co.), исто така доби осум номинации, вклучувајќи ја и онаа за најдобар филм.
Филмот беше номиниран за најдобар звук, најдобри костими и најдобро адаптирано сценарио, додека Џејмс Манголд доби номинација за најдобар режисер.
Како што многумина предвидуваа, Тимоти Шаламе беше номиниран за најдобар актер, а интересно е што „Дина, втор дел“ (Dune: Part II) каде исто така игра главна улога, е меѓу номинираните за најдобар филм.
„Анора“ (Anora), драма за сексуална работничка која се мажи за руски олигарх, освои шест номинации. Јуриј Борисов беше номиниран за најдобра споредна улога. Тој глуми телохранител на стриптизетата Анорa (Мики Медисон, исто така номинирана за Оскар во категоријата најдобра актерка), која бега со синот на руски милијардери. Борисов е првиот Русин кој е номиниран за престижната награда по пет децении. Последниот Русин кој беше номиниран за Оскар во актерска категорија беше Михаил Барижников во 1977 година за филмот „Пресвртна точка“ (The Turning Point). Последната Русинка која освоила Оскар беше Лила Кедрова за споредна актерка во култното остварување „Гркот Зорба“ од 1964 година.
Остварувањето „Човекот кој не можеше да молчи“, на хрватскиот режисер Небојша Слијепчевиќ, беше номинирано во категоријата најдобар краткометражен филм.
Филмот се занимава со воен злостор извршен врз патниците на возот на линијата Белград-Бар и херојскиот чин на пензионираниот офицер на ЈНА, Тома Бузова, кој во филмот го игра актерот Драган Миќановиќ. Минатата година освои „Златна палма“ на меѓународниот филмски фестивал во Кан, во категоријата краток филм и наградата на Европската филмска академија.
.webp){kind=icon}
