Луксузна јахта која порано беше во сопственост на санкционираниот руски бизнисмен Дмитриј Пумпјански ќе биде продадена на аукција в вторник, откако милијардерот не го отплати заемот на „ЏП Морган“ (JPMorgan Chase & Co.), според веб-страницата на аукционерот.
Ова ќе биде првата суперјахта што ќе се најде на јавно наддавање откако поради руската инвазија на Украина властите во западните земји ги „замрзнаа“ луксузните бродови во пристаништата ширум светот, изјави телефонски за Bloomberg, Најџел Холиер, брокер во аукциската куќа Howe Robinson Partners.
Јахтата „Аксиома“ (Axioma) беше запленета во Гибралтар уште во март од властите на британската територија на влезот во Средоземното Море. Вредноста на бродот се проценува на 63 милиони фунти, иако се очекува да се продаде под таа цена, објави Би-би-си, без да откријат како ја добиле таа проценета вредност.
Минатиот месец JPMorgan доби судски налог во Гибралтар со кој се дозволува продажба на јахтата долга 73 метри, откако Пумпјански се откажа од заемот од 20,5 милиони евра врзан за бродот, објави претходно Bloomberg, повикувајќи се на судски документи. Портпаролот на банката одби да коментира.
Бродот со 5 палуби, кој може да се пофали со т.н. бесконечен базен и 3Д кино, привлекува неверојатен интерес, рече Холиер, посочувајќи дека досега имало околу 115 распрашувања и 28 прегледи од потенцијални купувачи или нивни анкетни тимови. Тој одби да ја коментира вредноста на бродот, повикувајќи се на договорите за доверливост.
Пумпјански го стекна своето богатство во бизнисот со челик. Пред да биде санкциониран во март, тој го контролираше ТМК ПЈСЦ (TMK PJSC), најголемиот руски производител на челични цевки.
.webp){kind=icon}