Зошто светските музички ѕвезди се враќаат во Македонија?

„Хуверфоник“, еден од водечките трипхоп-бендови, в петок повторно ќе свири во Скопје. По двата експресно распродадени концерта во 2019 година, белгискиот состав пак ќе настапи во Филхармонијата, овој пат придружуван од гудачки квартет. Концертот е по повод 25 години од издавањето на албумот „The Magnificent Tree“.

По речиси шест години пауза, во Македонија се враќа уште едно големо музичко име. Брајан Адамс на 27 април ќе одржи концерт во салата „Јане Сандански“, а настанот е најавен како ексклузивен, само за 2.500 посетители. Канадскиот кантавтор доаѓа во Скопје во рамките на неговата турнеја „Bare Bones“, а најголемите хитови ќе ги изведе во акустична верзија, придружуван од неговиот долгогодишен пријател и пијанист Гери Брајт.

Бобан Милошески, сопственикот на промоторската куќа што ги организира овие настани, за „Блумберг Адрија“ раскажува што е пресудно за повторното доаѓање на светските музички ѕвезди во нашата земја и како воопшто течат преговорите.

„Процентот на светски артисти што доаѓаат во Македонија oткога ние ќе пишеме мејл до нивниот агент, наспроти артисти што самите први ни пишуваат, е сигурно 10 према 1. Кога се во прашање токму овие два концерта, ’Хуверфоник’ и Брајан Адамс влегуваат во овој еден процент“, вели Милошески од „Авалон продукција“.

Тој открива дека кога станува збор за „Хуверфоник“, приемот на нашата публика пред која минатиот пат имаа два еуфорични концерта во Филхармонијата било причина сега сами да се јават и да кажат дека имаат еден слободен ден и дека не им се важни парите, туку им е важно да ја имаат Македонија во овој дел од турнејата.

Брајан Адамс се враќа во Скопје со акустичен концерт Фото: Стефан Рајхл

„Иста е ситуацијата и со Брајан Адамс. Имаме официјален мејл од агентот со кој го договоривме претходниот концерт дека Брајан бил пресреќен од приемот во Македонија во 2019-та и тие сега самите се јавија за овој концерт. Што, пак, веројатно од друга стана доволно зборува и за рејтингот што го имаме ние како луѓе што се занимаваат со оваа работа“, вели Милошески.

По пауза од 15 години, летово во рамките на фестивалот „Скопје колинг“ во Македонија повторно ќе настапат и пионерите на трипхопот „Масив атак“. Овој концерт ќе се одржи на 28 јуни на стадионот на АРМ во Градски парк. Од „Авалон“ посочуваат дека се во добри односи со агентот и со менаџментот на англискиот бенд и информациите што ги добиле се дека тие сакаат да се вратат овде бидејќи претходниот концерт на отворено им останал во многу позитивно сеќавање.

„Ние сега им објаснивме дека не станува збор зa истата локација, туку за уште поубава, и така некако успеавме да го доведеме ова докрај. „Масив атак“ е бенд што многу вложува во делот на опремата, која ја носат сами, како видео, светла и миксети, така што очекуваме врвно музичко и концептуално аудиовизуелно доживување. А, кога ќе дојдат овде, ќе ги прашаме зошто нашето знаме го пуштаат на лед-екраните на сите концерти на последните неколку турнеи“, коментира нашиот соговорник.

На прашањето кој од овие претстојни концерти е најисплатлив за нив како организатори, тој ни го даде следниот одговор: „Ние немаме исплатливи и неисплатливи концерти. Се трудиме на крајот на годината да имаме повеќе исплатливи од неисплатливи. И тоа е единствената вистина. Не постои толку интелигентен човек во овој дел од светот, се разбира ова не важи за Западна Европа, кој може да претпостави кој концерт ќе донесе пари, а кој загуба“.

Има потенцијал за музички туризам, ни недостига логистика 

Без разлика дали првпат настапуваат кај нас или доаѓаат повторно, посетите на овие големи музички имиња имаат и големо влијание на локалната економија, а искуството со „Рамштајн“ во Белград минатата година најдобро го покажа тоа.

Милошески истакнува дека Скопје има бенефиции од сите светски концерти и дека со нив градот се профилира како европски град барем во овој сегмент на живеењето. Истовремено, тој нагласува дека и покрај 30-годишното искуство што го имаат и нивното богато портфолио, кое вклучува големи светски артисти и концерти на целиот Балкан, сѐ уште е сложен процес да се донесе звучно име кај нас.

„Да се букира артист е сериозен проблем, на ниво на наука. За  да се случи еден концерт не е доволно само да се состави мозаикот туку е потребно и да се обои со бои што ќе бидат прифатливи за артистот, менаџментот и агентот. Во нашата држава фали логистика, фалат професионалци во повеќе сфери, фалат концертни сали. Во моментов се чувствува во воздухот дека има желба концертната индустрија да се искачи на некое повисоко ниво, останува времето да покаже“, вели тој.

А, во светски рамки музичкиот туризам доживува експанзија. Овој пазар е еден од најбрзорастечките и се предвидува дека од скромни 6,44 милијарди долари во 2024 година ќе порасне на неверојатни 15,5 милијарди долари до 2034 година.

„Факт е дека глобалните трендови се такви што многу се патува на концерти и мислам дека некои мои апели придонесоа Агенцијата за туризам да прејде во Министерството за култура, со што би требало во иднина да се спојат убавото и корисното“, вели Милошески.

Првите придобивки оваа концертна сезона земјава би можела да ги почувствува летово, за кога се закажани концертите на „Масив атак“ и на Ник Кејв, кои имаат и регионален ексклузивитет. Голем интерес за овие настани покажуваат обожаватели и од Србија, Бугарија, Албанија и Косово, па организаторот се поврза со локални тикет-провајдери во секоја од овие земји.

И Ник Кејв конечно во Скопје

Македонските обожаватели со голема радост ја дочекаа веста дека во Скопје на 22 август конечно ќе запее Ник Кејв, еден од највлијателните и најпродуктивни творци во современата популарна музика. Тој доаѓа во Македонија во рамките на неговата соло-турнеја, без бендот „Бед сидс“, а на стадионот на АРМ во Градски парк ќе го придружува басистот на „Рејдиохед“, Колин Гринвуд.

„За да дојде Ник Кејв во Македонија, иако јас не ги сакам тие претерувања, беше навистина потребно да се случи чудо. Ник Кејв е еден од најспецифичните артисти на сите времиња и ми се чини како никогаш досега беше разгледувано сѐ - од рајдер-листата до локациjата на која ќе се одржи концертот“, открива Милошески.

Во моментов нема коментари за веста. Биди прв да коментира...

Остави коментар